Antes ne’e, Sekretáriu Jerál Parlamentu Nasionál, Mateus Ximenes Belo hatete ona katak, kuandu iha momentu mandatu remata entrega kedas xave karreta, maibé balun to’o ohin loron seidauk entrega hodi kontinua utiliza.

Observasaun diáriu ne’e nian nota katak, karreta Parlamentu Nasionál III Lejizlatura daudaun ne’e balun para ona iha resintu Uma Fukun, maibé balun eis deputadu sira kontinua utiliza ho xapa matríkula privadu.

Sekretáriu Jerál Parlamentu Nasionál (PN), Mateus Ximenes Belo hatete, karreta prado sira ne'ebé durante ne’e deputadu III Lejizlatura sira utiliza hala’o servisu Parlamentu Nasionál komesa balun entrega, maibé balun mak seidauk.

“Ha’u halo ona karta xamada dala rua ba sira, maibé to’o ohin loron sira seidauk mai entrega. Maibé, ami sei kontinua halo nafatin karta xamada ba sira atu bele mai entrega karreta ne’e”, dehan nia, iha Uma Fukun PN, horisehik.

Karreta sira ne’e eis deputadu sira lori ba uma to’o agora seidauk entrega, maibé Parlamentu Nasionál mós la fó data limitasaun ba sira hodi entrega ba Konsellu Administrasaun.

“Sira ne’e hanesan membru parlamentu nasionál, tanba ne’e ita konsidera sira, la'ós ita atu obriga sira hadau de'it karreta, maibé ami sei halo jestaun”, dehan Mateus.

Maski nune’e, Sekretáriu Jerál PN kontinua esforsu aan hodi kontinua buka nafatin aprosimasaun ho eis-deputadu sira ne’e para oinsá bele entrega ona karreta sira atu bele halo jestaun.

Tuir nia, karreta sira ne'ebé daudaun para ona iha resintu Parlamentu Nasionál nian ne’e, eis-deputadu sira entrega kedas iha momentu simu tomada pose.

Relasiona ho tranzasaun karreta foun ba Deputadu IV Lejizlatura ne’e parte Konsellu Administrasaun Parlamentu Nasionál suspende prosesu aprovizionamentu, maibé atu sosa karreta foun ba deputadu foun sira ne’e depende ona ba polítika IV Lejizlatura.

Antes ne’e, Prezidente Parlamentu Nasionál, Aniceto Longuinhos Guterres hatete, prosesu alienasaun ne’e III Lejizlatura halo ona desizaun. Tanba ne’e, IV Lejizlatura kaer nafatin desizaun, maibé plenária IV Lejizlatura bele mós halo mudansa seluk.

“Ha'u hanesan Prezidente Parlamentu Nasionál ha'u labele dehan katak sei la muda, plenária mak soberanu”, dehan Aniceto iha PN.

Tanba ne’e, situasaun kona-ba karreta sira ne’e hotu-hotu hein plenária parlamentu ne’e sei iha desizaun seluk ka mantein nafatin.