Desizaun ne’e Xefe Estadu foti bazeia ba lista tuir desizaun ne'ebé partidu koligasaun deside hamutuk hodi aprezenta ba Prezidente Repúblika, iha loron Kuarta (13/9).
“Prezidente Repúblika hola nia kompeténsia konstitusionál tuir artigu 106 no 85 alínea d) nian, nomeia Mari Alkatiri atu sai Primeiru Ministru ba VII Governu Konstitusionál liu husi dekretu Prezidente Repúblika nian”, dehan Lú-Olo, iha Palasiu Prezidénsia Repúblika, Ai-Tarak Laran, horisehik.
Nia esplika, Prezidente Repúblika depois rona partidu koligasaun nia relatóriu no desizaun mai aprezenta kandidatu ba kargu Primeiru Ministru nian, Prezidente Repúblika hola nia kompeténsia tuir konstituisaun, atu nomeia primeiru ministru ne'ebé sira indijita mai iha Prezidente Repúblika.
Tanba ne’e, Prezidente timoroan ne’e husu ba sidadaun Timor tomak para atu bele hakmatek nafatin tanba la kleur sei sei fó tomada pose ba VII Governu Konstitusionál.
