Ne’e duni, Lere rasik deklara prontu atu kontinua asume kargu CEMGFA bainhira governu fó konfiansa ba komandante fitun rua ne’e.

“Nu’udar timoroan, ha’u terus ba rai ida ne’e no ema barak mate ba rai ida ne’e, ita nunka rejeita atu serbí ita nia nasaun no povu. Enkuantu ita sei moris bele ho atividade oioin mais ita prontu nafatin atu serbí ita nia povu, ita nia nasaun,” dehan Lere, iha Palasiu Prezidensiál Ai-Tarak Laran, horisehik.

Nia hatutan, funu ba rai ida ne’e la'ós atu aproveita hetan di'ak, maibé funu ba rai ida ne’e povu iha Nasaun ne’e.

Lere rekoñese ninia mandatu remata iha Outubru 2017, maibé sei hein desizaun husi governu foun tanba to’o agora mós seidauk forma.

Nia dehan, servisu hotu-hotu agora tuir lei. Ne’e duni, Lere sei kumpre ba desizaun hotu-hotu ne’ebé governu foun mai sei foti tuir lei ne’ebé iha.

“Agora ita bazeia ba lei. Ita hanoin katak ne’e kompeténsia Governu ninian iha Outubru hakotu ha'u ho ha'u nia Vise, mais ida ne’e desizaun polítika no depende desizaun Governu ninian,” tenik nia.

Nune’e, iha soru-mutu ne’e, Xefe Estadu F-FDTL ne’e relata mós situasaun Forsa Defeza ninian no situasaun iha rai laran.

Prezidente Repúblika, Francisco Guterres ‘Lu Olo’ mós informa situasaun polítika situasaun ne'ebé atraves agora daudauk ne’e.