Uma adat lospalos ne’ebé lokaliza iha Bairru-Sentral besik kaza Kultural Munisipiu Lautem, ne’e harii iha Indonezia nia tempu, no oras ninia kondisaun grave ona, tanba ne’e presiza hadi’a.
Uma adat ne’e sai ona Icon ida ne’ebé reprejenta uma adat iha Timor-Leste tomak, ne’ebé Ministeriu Turizmu sempre halo promosaun iha fatin-fatin hodi hatudu ba mundu katak Timor iha nia kultura, maibé uma ne’e atu besik monu ona mós governu la tau matan.
Haree husi situasaun ne’e Koodenadór Komisaun Eventual Lee Iaval Hugo Sanches Viana hatete, Lautem-oan ne’ebé hela iha Reinu Unidu maizumenus na’in 1.500 hala’o ona sorumutu iha Oxfor ho objektivu atu hari fila fali uma adat (Lee Iaval), iha Munisipiu Lautem.
Uma adat ne’e harii husi beiala sira nia vontade hanesan simbolu kultural nian, laiha estadu ida mak finansia hodi harii, entaun hanesan Lautem-oan foti inisiativa hodi lolo liman ba malu, tau forma hamutuk atu harii hikas uma adat ne’e.
“Komisaun ne'e sei halo angariasaun fundus, halo koordenasaun servisu ne’ebe di’ak ho ekipa sira iha rai laran nomos iha rai liur, hodi halo mos enkontru no evalua ba progresu servisu harii uma adat (Lee Iaval) nain,” dehan nia, liu husi WA, iha Oxfor (20/7).
Hugo dehan, servisu oras ne’e la’o dadauk ona ekipa servisu ida iha Reinu Unidu sei halibur fundu to’o prosesu konstrusaun ne’e remata foin sira nia servisu ne’e remata.
