Informasaun ne’e hato’o husi deputadu Bankada KHUNTO Luis Roberto iha plenaria Parlamentu Nasionál, Tersa (21/07).

“Teniku EDTL na’in lima ne'ebé Ministru Salvador hasai mak hanesan, João Batista Verdial, Nelio Asuncão de Jesus, Junito Estevão Araújo Reis, Januario Ivan Dias Marcal, no Elo King Benay da Costa Marques,” informa Luis iha PN.

Deputadu Luis hatete, aktu Ministru Salvador hodi hasai tekniku EDTL na’in lima ne’ebé serbisu ona durante tinan 5 to’o tinan 8 ne’e ladun di’ak.

“Kuandu hasai, ne'e signifika violasaun ida ba ita-nia funsionariu sira, atu halo ema ne'e moras de’it,” dehan nia.

Ho situasaun ne’e, nia husu ba Ministru Obras Públiku atu bolu fila fali funsionariu na’in lima ne'e no koalia didi’ak ho sira.

“Sira nai’n lima ne'e ezije sira-nia direitu iha Covid-19 nian ne'e iha primeiru lina, inklui EDTL mós iha lina oin hotu hodi servi ba nasaun ida ne'e, ikus fali mai funsionariu sira ne'e rekere sira-nia direitu, Ministru Salvador foti desizaun hodi hasai tiha, ida ne'e masuk akal ka lae,” nia kestiona.

Luis dehan, maske bankada KHUNTO hanesan Bankada governu, maibé la aseita ho aktu ministru Salvadór.

“(Bankada KHUNTO) Hakarak atu koalia buat ne'ebe loos ba loos, sala ba sala duni, tanba ne’e fó hatene ba ministru atu bele hadia problema ida ne'e, labele hatudu hahalok ida ne'ebé buka hasai de’it, ne'e labele.”

Iha fatin hanesan, Vise Xefe Bankada CNRT, Patrocino dos Reis Fernandes konsidera Ministru Salvador ninia mandatu, nia kria de’it problema no nunka atu rezolve problema.

Patrocino dehan, Ministru Salvador hasai orientasaun ba kompaña Wotsila hodi hasai funsionariu na’in lima tanba de’it ezije sira-nia direitu.

“Tanba de’it sira hato'o  sira-nia hanoin, espresa sira-nia hanoin kona-ba direitu ba bainhira sira serbisu iha periodu estadu emerjénsia, sira hanoin sira mós iha direitu atu hetan hotu subsidiu,” nia hatete.

Tuir nia, funsionariu na’in lima ne’e mós husu ona deskulpa ba sira-nia aktus balun ne’ebé ladun di’ak, maibé mosu nafatin influensia atu hasai sira.

“Ha’u hakarak hatete, ministru Salavador durante ninia mandatu ne'e kria mak problema de’it, buat ida nia halo ne'e estudu hela de’it maibé problema barak mak nia halo.”

Entertantu, ba kestaun ne’e, Ministru Asuntu Parlamentar no Komunikasaun Sosial (MAPKomS) Francisco Jeronimo deklara, nia parte toma nota no rejistu no sei relata ba ministériu kompetente iha reuniaun Konsellu Ministru.