Sekretariu Jeral CNJTL Mateus Lemos hatete, CNJTL ne’ebé nu’udar mahon ba Organizasaun Massa Rezistensia ne’ebé transforma an husi Prezidiun Juventude Loriku Assuwain (PJLA), sei la hola parte ba asaun ne’ebé grupu Rezistensia Nasionál Defende Justisa no Konstituisaun RDTL (RNDJ-KRDTL) organiza.

Tuir Mateus, atu envolve iha asaun ruma, ema tenke halo separasaun ba interese nasional no interese politika hodi hetan poder no pozisaun.

“CNJTL hamrik atu defende de’it ba iha interese nasional hodi hatur integridade estadu nian. Mezmu durante ne’e Timor-Leste hasoru hela impasse maibé seidauk iha krize boot ida. Preokupasaun ne’e mosu iha elite politiku sira nia le’et de’it,” dehan Mateus iha nia knar-fatin, Farol, Tersa (21/07).

Tan ne’e, nia dehan, CNJTL aposta liu ba dialogu duke halo manifestasaun, tanba manifestasau ne’e bele halo kuandu hasoru situasaun ida ne’ebe prinsipal liu hasoru integridade estadu ka soberania estadu nian.

“CNJTL aposta ba dialogu, la aposta ba iha manifestasaun. Manifestasaun ne’e a nao ser que haree asuntu ne’ebé prinsipal liu ba povu nia moris, liu-liu defende integridade estadu no soberania estadu nian, ida ne’e mak CNJTL nia pozisaun, ita lalika mobiliza ema barak hodi infiltra ba iha ema seluk ninia interese.”

“Hanesan uluk kuandu ita halo demostrasaun iha embaixada Australia nia oin hodi defende ita-nia fronteira maritime, CNJTL mobilzja organijasaun massa juventude hotu-hotu hodi konsentra no halo demostrasaun, ida ne’e tanba interese nasional,” nia hatete,

Nia hatete, bainhira impasse politika mosu, CNJTL organija ona ninia membru sira no lider organijasaun sira iha Munisipiu 12 no Rejiaun Administrativa Espesial Oekusse-Ambeno hodi halibur opiniaun no hato’o ba Prezidente Repúblika liu husi enkontru formal ida.

Tuir nia, realidade ezijensia husi povu nian mak oinsa atu bele hetan dezenvolvimentu, maske loos duni katak situasaun politika durante tinan naruk fó impaktu negativu ba povu.

Maibé, nia hatete, atu hatun PR Lu Olo ne’e elite sira-nia preukupasaun, la’os povu baibain sira-nia preokupasaun.

“CJTL hare katak impaktu husi desizaun sira ne’ebé durante ne’e PR foti loos duni iha ema barak ne’ebe kritika, ate lider nasional sira mós balun kritika katak problema nia huun ne’e mai husi Aitarak Laran, ne’e prespetiva ne’ebé mak durante ne’e ema hato’o, maibé ita haree mós husi aspetu seluk, iha mós pensamentu di’ak sira ne’ebé oinsa mak bele viabilija estadu hanesan estadu soberanu ida, atu nune’e ema hotu iha nasaun ne’ebé di’ak hodi tane estadu ne’e,” nia esplika.

Nia dehan, desizaun hotu bele halo maibé tenke garante katak desizaun hirak ne’e bele fó impaktu ne’ebé pozitivu ba ema hotu.

“Ita tenke tetu katak mezmu ke ita iha hela impasse politika nia laran maibé ita la hasoru krize boot ida ne’ebé mak fó afetasaun boot ba iha povu, mezmu iha hela situasaun defisil, liu-liu liga mós ho Covid-19 ne’ebé lori mós risku boot ida hodi ezije boavontade entidades hotu-hotu atu bele hasoru situasaun ne’e”.

Tan ne’e, tuir Mateus, di’ak liu entidade hotu-hotu konsentra hodi kontribui ba governasaun ne’e ba oin hodi bele aselera prosesu dezenvolvimentu no fasilita povu atu asesu mós ba dezenvolvimentu.