Ne’e duni, ho inisiativa, Governu fó delegasaun kompeténsia ba Ministru Adjuntu Primeiru Ministru asuntu Fronteira Marítima, Hermenegildo ‘Agio’ Pereira, hodi dezloka ba Austrália atu diskute kona-ba prosesu Greater Sunrise nian.

“Xefe Negosiadór de'it laiha konfirmasaun, oinsá mak Governu hatene prosesu ne’e. Ne’e duni, Governu fó autorizasaun ba Ministru Agio Pereira hodi diskute asuntu ne’e, iha Sidney-Austrália”, dehan Primeiru Ministru, Mari Alkatiri, iha Vikeke, horisehik.

Nia esplika, Governu tenke inisia ona prosesu ne’e ba oin, bainhira la la’o povu sei fó kulpa ba Governu tanba la kontinua atualiza prosesu ne’e ba oin.

Ne’e duni, Governu Timor-Leste kontinua hein bainhira Governu Austrália halo retifikasaun ba prosesu negosiasaun mina matan Greater Sunrise nian.

Hein Lejitimidade Governu

to’o oras ne’e lakon kontaktu ho Xefe Negosiadór Xanana Gusmão, maibé bainhira hetan lejitimidade konfirmandu hafoin eleisaun antesipada sei buka hasoru malu.

Nia dehan, eleisaun antesipada remata mak bolu xefe negosiadór hodi aprezenta akta reuniaun no mós dokumentu balun ne’ebé durante ne’e Governu haruka ba xefe negosiadór.

“Ha'u kuandu bolu nia (Xanana) bainhira ha'u nia lejitimidade konfirmandu ona, tanba ne’e eleisaun antesipada hotu mak ha'u bolu nia”, tenik Alkatiri.

Tuir nia, Governu kontinua fó konfiansa ba ekipa negosiasaun ne’ebé durante ne’e diskute fronteira marítima, maibé Governu la’ós fó konfiansa iha oin no kung-fu husi kotuk.

Antes ne’e, Xefe Negosiadór Prinsipál ba Delimitasaun Fronteira Marítima, Kay Rala Xanana Gusmão hateten, VII Governu Konstitusionál labele husu ba ema ne’ebé la'ós membru governu, maibé husu maka Ministru Adjuntu Primeiru Ministru asuntu Delimitasaun Fronteira Marítima nian.

“Deskulpa la'ós ha'u Xanana maka atu halo relatóriu ba governu. Membru governu ne’e iha ne'ebá duni, husu ba nia”, tenik Xanana.

Luta ba fronteira marítima la'ós atu buka asinatura, maibé luta ida ne’e atu buka manan. Kuandu buka maka asinatura de’it, luta ne’e folin laiha.