Ministra Edukasaun, Dulce De Jesus Soares hatete, atu garante asesu edukasaun di'ak iha rai laran presiza labarik sira-ne'ebe mak idade 3-5 tama ba pre-eskolár.

Ministra Dulce dehan, tanba dadus hatudu katak labarik barak mak seidauk tama ba pre-eskolár, maibe sira direita ba Eskola Ensinu Báziku.

“Tuir dadus EMIS mós hatudu katak foin estabelesimentu Pre-eskolár kuaze 600 ho tipu jestaun oi-oin hanesan públiku, privadu, Katólika, komunidade no entidade privadu,” Dehan Ministra Dulce, liu husi nia diskursu ne'ebé INDEPENDENTE asesu,  Tersa (16/04).

Tanba ne’e nia informa, governu liu husi Ministériu Edukasaun, tau importánsia ba Edukasaun pre-eskolár, tanba pre-eskolár mak fó oportunidade ba labarik sira ho idade 3-5, antes sira tama ba Eskola Ensinu Báziku sira.

“Ministériu Edukasaun fó importânsia ba estudante pre-eskolár, tambá pre-eskolár mak fó oportunidade ba labarik sira ho idade 3-5 no halo preparasaun fundamentál liu-liu iha área literásia, númerasia no mós dezenvolvimentu sosio-emosionál, molok tama ba Ensinu Báziku,” Nia relata.

Ministra Dulce salienta, Ministériu Edukasaun mós  kontinua harii edifísiu pre-eskolár, no mós foti adapta  programa intensivu sira hanesan pre-eskolár komunitária, programa prontidaun eskola ho sai efetivu liu, tambá bele halo durante tempu badak no mos fleksivel liu.

“Prepara  labarik sira ho idade kiik molok tama iha Ensinu Báziku, esforsu ida-ne’e sei fó biban ba ita atu garante katak labarik idade 3-5 ne’ebé seidauk partisipa iha pre-eskolár bele hetan oportunidade halo preparasaun ba Ensinu Báziku,” Kata nia.

Aliende ne'e Ministériu Edukasaun mós kontinua garante no forñese materiál didatiku sira nomos livrus sira hodi promove no reforsa aprendizajen literasia no númeria baze sira.

Nune'e mós husu ba manorin pre-eskolár sira atu utiliza fatin halimar ba estudante sira ho di'ak, tanba maneira aprendizajen labarik sira-ni’an. Aliende aprende iha sala laran, tenki iha mós fatin halimar ba sira.

Iha ne’ebé mak iha Pré-eskolár, iha mós fatin halimar ba sira, tanba maneira aprendizajen iha sala laran iha mós fatin ba sira hodi halimar, tanba labarik sira aprende liu husi halimar, halimar no aprende.

“Iha fatin halimar ida ka ita hanaran “Playground”,  maibé ha’u repara katak fatin ne’e la uza, maibé  profesór sira dehan katak uza, ita hakarak dehan katak kuandu iha ne’ebé mak iha Pré-Eskolár, iha mós fatin halimar ba labarik no mós estudante 1º anu, sira mós bele tama ba halimar hamutuk,” Nia afirma.

Nia fundamenta, ba estudante sira ne’ebé bo’ot ona karik labele utiliza fatin halimar ba pre-eskolár sira, tanba bele estraga fatin sira-ne’e.