Alkatiri: Vizita Papa Francisco Hanesan Bensaun Boot Featured

By Agustino Gama Abril 17, 2024 1017
Sua Santidade Papa Francisco. Foto:Google. Sua Santidade Papa Francisco. Foto:Google.

DILI: Partidu Frente Revolusionariu Timor-Leste Independente (FREITLIN) hateten, vizita Sua Santidade Papa Francisco mai Timor-leste hanesan bensaun boot hodi halibur povu sira.

Sekretariu Jeral FRETILIN, Mari Alkatiri hateten, partidu FRETILIN senti agradese no hato’o bemvindu ba Sua Santidade Papa Francisco nia desizaun atu mai Timor-Leste.

Nia dehan, partidu FRETILIN haksolok tebtebes ho anunsiu husi Konferensia Episkopal TImorense (CET) nian iha loron-12 Abril 2024 kona-ba kalendariu vizita Papál Sua Santidade Amu Papa Francisco nian mai Timor-Leste.

Anunsiu ne’ebé hala’o liuhusi Pe. Carlos Roben, Sekretariu Ezekutivu CET nian, deklara ofisialmente katak konfirmadu ona Amu Papa Francisco sei vizita Timor-Leste husi 9 to’o 11 Setembru 2024.

“FRETILIN haksolok tebes tamba vizita Santo Padre nian ne’e nu’udár Grasa no bensaun boot ida mai povu no Nasaun Timor-Leste,” dehan Alkatiri liu-husi komunikadu ne'ebe diáriu ne’e asesu, horisehik.

"Bainhira Amu Papa São João Paulo II vizita mai Timor-Leste iha 12 Outubro 1989, São João Paulo II la’os de’it sai úniku lider mundial ne’ebé mai vizita Timor-Leste, maibé Amu Papa nia vizita ne’e mós halo mundu tomak asiste asswain foin-sa’e Timor oan sira ba dala uluk liu halo manifestasaun iha públiku kona-ba Povu Timor-Leste nia luta ba Ukun Rasik An,” nia  hatutan.

Nia salienta, Amu Papa Francisco nia vizita tinan ida ne’e mai Timor-Leste mós konesidu ho loron ida importantetebes iha Timor-Leste nia historia, tamba vizita Papál ne’e se konklui iha loron-11 fulan-Setembru, loron ida ne’ebé iha signifikadu boot rua iha Timor-Leste nia historia no identidade nu’udár Nasaun no Povu.

“Iha 11 Setembru tinan 50 liu ba, Timor-Leste nia Fundador sira transforma ASDT ba FRETILIN hodi sai nu’udár frente ampla ida ne’ebé bele hakuak nasionalista hotu-hotu atu luta ba ita nia ukun rasik-aan,” nia esplika.

“La’os ida ne’e deit, iha 11 Setembru ne’e mós mak naran ba ita nia Nasaun, ‘Timor-Leste’ hahu mosu ba públiku liu husi FRETILIN nia naran, Frente Revolusionaria TimorLeste Independente. Antes loron ne’ebá ema kuńese ita ho deit naran Timor Portugues ka Timor-Oriental,” Sekretariu Jeral FRETILIN hatete.

Nia hatutan, FRETILIN agradese profundamente no haksolok tebes ho desizaun Amu Papa Francisco nian hodi konklui ninia vizita iha loron ne’ebé FRETILIN selebra tinan 50 ninia ezistensia.

“FRETILIN fiar katak vizita Amu Papa Fransico nian ida ne’e sei hanesan bensaun bo’ot ne’ebé halibur povu Timor-Leste tomak atu bele hamutuk luta ba halo povu Timor-Leste tomak sente dezenvolvimentu nu’udar rezultadu husi Ukun Rasik An, hanesan tinan 50 liu ba hahu luta ba Ukun Rasik An hamutuk ho FRETILIN,” Nia konklui.

Entretantu, iha tinan 2020, Prezidente da Repúblika Dr. Francisco Guterres Lú-Olo haruka karta ida hodi konvida Amu Papa Francisco mai vizita Timor-Leste.

Tuir planu, Amu Papa Francisco atu mai vizita Timor-Leste iha tinan-2020 nia laran, maibé tamba pandemia COVID-19 no Amo Papa nia saúde rasik la permite, nune’e adia tiha vizita Papál ida ne’e.

Rate this item
(0 votes)

Independente Digital TV

Tuir ami iha Twitter

Kalendariu Notisia

« June 2024 »
Mon Tue Wed Thu Fri Sat Sun
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30