Diretór Jerál Tékniku Autoridade Komunikasaun Sosiál (ANC), João Olívio Freitas hateten, ANC nu’udar órgaun reguladór ba operadór Timor Telecom, Telemor no Telkomcel, tanba ne’e ema hotu tenke halo rejistrasaun ba sim card.

Nia dehan, dala barak ema barak uza sim card, maibé la rejistu konsidera ilegál hodi lansa informasaun falsu.

“Ba kartaun sira ne’ebé la rejistradu ami sei blokeiu hotu”, dehan João, iha Kuartél Jerál PNTL, Kaikoli-Dili, horisehik.

Nia dehan, daudaun ne’e ANC halo ona komunikasaun ho ho operadór tolu hodi implementa, liuliu kona-ba obrigatoria kliente sira hodi halo rejistu.

Diretór ne’e afirma, rekizitu sira ne’ebé sosa kartaun sim card hodi rejistu maka ba estudante tenke lori kartaun estudante, labarik minoridade tenke lori sertidaun RDTL no adultu sira uza eleitorál ka billete identidade, nune’e sidadaun estranjeiru tenke lori pasaporte.

João afirma, entre kliente ho númeru ne’ebé aas liu maka Timor Telecom ho kliente 600.000, Telemor 530.000 no Telekomcel maka númeru natoon.

Entre kliente hirak ne’e balun rejistu no balun seidauk rejistu, tanba ne’e ANC aselera ba operadór sira ne’e hodi halo rejistrasaun ba kliente sira ne’ebé uza kartaun sim card.

Nia Haktuir, ho maneira hirak ne’e hodi minimiza sidadaun sira lansa informasaun falsu ba públiku rezulta hamosu konflitu.

Polítika ne’e hetan apoiu husi operador sira hodi estabelese rejistrasaun ba kartaun sim ne’ebé maka utiliza. Ba sidadaun ne’ebé la rejistu, ANC hamutuk ho operadór sira sei blokeiu kartaun ne’e.