Maibé iha parte lezada lakohi atu dada fila krime ne’e tanba arguida baku lezada to’o nia nehan nomu no mos lezada nia ulun suku ba pontu rua.

“Ha’u bele dada fali krime ne’e maibé tenke ser ho kondisaun, tanba ha’u-nia nehan monu no ha’u nia ulun suku ba pontu rua, kondisaun mak arguida fó osan US$600 para ha’u ba troka fali ha’u nia nehan ne’ebé monu ne’e,” dehan lezada iha sala julgamentu, Tribunal, horisehik.

Hataan ba kestaun lezada nia arguida la aseita tanba arguida nia osan laiha atu selu lezada nia nehan.

Tribunál rona tiha husi parte rua ne’e Tribunál kontinua halao julgamentu katak, tuir akuzasaun husi Ministériu Públiku ne’ebé aprezenta ba Tribunál le sai, iha loron 11 Novembru 2019 , tuku 11:00 dadeer, iha loja Top One oin Audian, iha momentu ne’eba arguida ba husu osan $50 iha lezada nia servisu fatin.

Iha momentu ne’eba arguida ho lezada hamosu diskusaun tanba arguida husu fila-fali nia osan ne’ebé fó ba lezada atu fó fahi ba arguida, iha diskusaun ne’e lezada hodi manu fulun baku iha arguidu nia hirus matan.

Tanba ne’e, arguida hodi pakasete baku lezada nia ulun hodi rezulta suku pontu rua no nehan ida monu.

Arguida nia hahalok ne’e halo lezada sente moras iha fatin atenjidu, tanba ne’e mak Ministeriu Públiku akuza arguida ba krime ofensas integridade fiziku simples ne’ebé previstu iha artigu 145 husi kodigu penal.

Hataan ba akuzasaun ne’e arguida deklara ba Tribunál katak, iha faktu balun loos no balun la loos.

Iha momentu diskusaun ne’e lezada mak tebe uluk arguida nia kabun dala rua to’o arguida monu ba rai.

“Ne’e ha’u foti kapasete hodi baku nia, maibé antes ne’e lezada mak baku uluk ha’u,” dehan arguida.

Arguida deklara kona-ba lezada nia nehan monu arguida laiha konesimentu, tanba iha momentu ne’eba la’os arguida mak baku uluk lezada maibé lezada mak baku uluk arguida.

Nune’e mos lezada deklara ba Tribunál katak, faktu sira iha akuzasaun laran ne’e loos hotu kedas.

“Laos ha’u mak husu ba arguida atu sosa fahii maibé arguida mak presija fahi tanba ne’e mak ha’u mos presiza osan entaun ha’u simu arguida nia osan,depois ha’u hatete depois mak imi ba kaer fahi iha uma, maibé sira la ba uma to’o ami baku malu iha loja,’’ dehan lezada ba Tribunál.

Tribunál rona tiha husi parte rua Tribunál adia julgamentu ne’e ba fali loron 3 tuku 11:00 hodi rona testamuna.

Adensia julgamentu ne’e preside husi juis singular, Maria Solana, Ministériu Públiku reprezenta husi prokuradóra Ivonia Guterres, arguida hetan asistensia legal husi defensória públiku Sergio Dias Quintas.