Deputadu husi PD no CNRT ejize ba governu atu kontrola movimentu balun ne’ebé klandestinamente fó juramentu ba sidadaun balun hodi favorese ba partidu politika balun.

Xefe Bankada PD Antonio da Conceicao “Kalohan”, husu ba governu ne’ebé kompleta ona ninia estrutura atu fó eduakasaun sidadania hodi prepara ema ba future, la’os atu sai matenek de’it, maibé oinsa atu konstitui sidadaun sira sai sivilizadu hodi hatene dignifika malu.

Nia hatete, situasaun politika rai laran la’o iha andamentu balun ne’ebé koko atu destroi kultura Timor nian.

“Agora daudaun ne’e iha movimentu balun la’o tenta atu esplora povu nia ignoransia, prinsipiu luta ninian ne’ebé iha atu liberta povu husi obskurantizmu atu labele halo fali povu ne’e monu ba esplorasaun homen,” dehan nia iha Parlamentu Nasionál, Segunda (29/06).

Nia husu ba govenu atu tenke foti asaun ba movimentu sira ne’ebé daudaun ne’e radikalmente la’o hela hodi esplora povu sira liu husi atividade sektarial.

“Ita labele hamosu fali hahalok juramentu sira ne’ebé la eduka ita-nia povu. Agora daudaun ne’e ita tama ona ba erra millenium nian, ema foku ona ba siensia, teknolojia, maibé ita ba fali halo esplorasaun do homen pelu homen, pior liu tan se ida ne’e orientadu ba atividade politika ruma ne’e la di’ak,” dehan nia.

Kalohan dehan, partidu politiku ne’e atu orienta povu sai sivilizadu la’os atu halo beik povu hodi ba monu iha buat aat.

Tan ne’e, nia afirma, governu tenke prevene lalais aktu sira hanesan ne’e, tanba ne’e bele detroi sosiedade nia valor sira.

“Ita tenke respeita malu, dignifika malu, maibé esplora, liu-liu obskurantizmu ba favoresimentu politiku partidu laiha fatin. Ami husu atu halo seprasaun atividade politika, rituais, no relijioza ne’ebé halo povu lakon nia futuru,” dehan nia.

Iha fatin hanesan, Eis Prezidente PN Arão Noe de Jesus husu ba governu atu tenke buka hapara atividade sekta sira ne’ebé oras ne’e la’o iha komunidade nia leet.

“Ha’u hanoin katak governu tenke tau atensaun atu labele iha tan aproveita obskutantizmu ne’ebé iha hodi favorese ba interese privadu no organizasaun,” dehan nia.