Durante prosesu pagamentu subsídiu hahú husi loron 9 Juñu too remata, iha munisípiu Dili mak tarde uitoan tanba benefisiáriu iha nivel nasionál aas tebes ho totál benefisiáriu hamutuk 64.913, nune’e la konsege hotu iha loron 14 ne’ebe deterimina husi governu MSSI.

Diretór Jerál MSSI, Rui Manuel Exposto hatete, prosesu pagamentu hahú husi loron 9 Juñu to'o 27 Junu durante prosesu pagamentu uma -kain iha 12 munisípiu hamutuk 11.833 mak halo reklamasaun tanba naran hirak ne'e laiha lista pagamentu.

"Naran sira ne'ebé laiha lista sei halo reklamasaun iha suku no haruka ba MSSI hodi fó tempu loron 15 hodi Verifika dadus hafoin halo pagamentu”, dehan nia, iha knaar fatin Kaikoli, horisehik.

Nia hatutan, MSSI sei halo avaliasaun ba reklamasaun sira ne'e ida por ida no sei hato'o ba públiku husi reklamasaun sira ne'ebé tama mai iha MSSI ho totar 11.833 ne'e hira mak elejivel atu simu no hira mak labele simu tanba ho razaun oioin ne'ebé hato'o husi MSSI.

Oekusi sei Selu iha Loron 4 Jullu

Governu liuhusi MSSI ne’ebe halo pagamentu subsídiu $200 ba uma-kain iha 12 munisípiu inklui Oekusi, iha munisípiu 12 remata ona no ekipa MSSI sei halo pagamentu ba benefisiáriu sira iha RAEOA hahú iha Loron 4 Jullu.

Diretór Jerál MSSI hatete, data ne'ebé termina husi MSSI iha loron 30 Juñu ekipa MSSI destaka ba Oekusi hodi halo sosializasaun ba autoridade suku sira no fó formasaun ba ekipa sira hafoin iha loron 4 Jullu sei halo pagamentu ba benefisiáriu sira.

"Pagamentu ba benefisiáriu sira iha loron 4 Jullu ho durasaun tempu loron 10", dehan nia.

Entretantu tuir dadus, lista benefisiáriu sira iha Oekusi hamutuk rihun 23 ho nia orsamentu ne'ebé aloka hamutuk tokon $4.