Ne’e duni, hatudu hela katak partidu koligasaun ne’e la metin hanesan ho koligasaun sira seluk ne’ebé forma antes ne’e. Ne’e duni, tenke kuidadu no haree regra dixiplina iha forma koligasaun ne’e nian.

“Partidu tolu ne’e la metin ida, karik sira iha buat ida naran dixiplina votu ne’e. Signifika katak iha ona pre-akordu ida ba kandidatu FRETELIN nian ida tenke hetan votu 35, maibé bainhira soma hamutuk ba partidu tolu ne’e hetan de'it 33”, dehan eis-deputadu, Manuel Tilman, iha ninia servisu fatin, horisehik.

Ne’e duni, nia sujere atu desizaun sira ne’ebé governu sira atu foti tenke efikás la’ós ba deside tun-sa'e.

Maski nune’e, Manuel Tilman fiar katak, kuandu Mari Alkatiri mak sai primeiru ministru governu sei la monu. Sei define klaramente polítika hakarak atu halo ponte ida sai duni ponte, hakarak atu halo estrada sai duni estrada la bele halo jardín tun sa'e karreta soke malu.

Agora klaru sei iha problema forma governu, maibé partidu tolu ne’ebé tuur hamutuk ona hodi ko'alia didi'ak ba malu.

Kona-ba Comité Central FRETILIN (CCF) ne’ebé indijita Mari Alkatiri ba primeiru ministru, Manuel Tilman, fó kongratulasaun tanba esperiénsia hatudu ona iha tempu UNTAET.

Entretantu, iha parte seluk, Diretór Ezekutivu JSMP, Luis de Oliveira Sampaio hatete, kestaun kona-ba lei, liu-liu ba Konstituisaun RDTL iha Artigu 106 katak Primeiru Ministru hili husi partidu ne’ebé iha votu barak liu iha Parlamentu Nasionál ka partidu koligasaun ne’ebé harii, entaun laiha kestaun iha lei.

Nia dehan, Mari Alkatiri uluk sa'e ona ba Primeiru Ministru saida mak akontese iha situasaun ho krize 2006 ninian, maibé agora prosesu normál ne’e mós husi sira nia estatutu ne’e depende ba partidu koligasaun.