Maibé, Assanami informa kandidatu PM ne’e seidauk ofisializa husi Bloku Koaligasaun tanba sei aprejenta ba fali Presidente Repúblika atu bele indizita.

“Naran ne’ebé mak atu sai ba Primeiru Ministru ne’e iha públiku ema barak hatene ona katak Sekretáriu Jerál partidu FRETILIN Mari Alkatiri mak atu sai PM maibé tuir konstituisaun haruka tenke konvoka enkontru ho partidu koaligasaun mak bele halo proposta ba iha Presidente Repúblika atu bele indizita,”dehan Assanami iha bankada PD, Kinta horseik

Kompozisaun presidénsia parlamentár kompleta ona, tuir eis Ministru MAP ne’e katak Bloku Koaligasaun hahú konsentra ona ba mekanismu formasaun VII governu nian.

“Ami sei tuur hamutuk hodi aprejenta naran Primeiru Ministru ba Presidente Repúblika kuandu aseita ona hafoin diskute ba membru Governu nian,”Assanami informa.

Kuandu Presidente Repúblika anunsia ofisiál naran Primeiru Ministru mak nia sei hili membru Governu hodi ba xefia instituisaun estadu sira.

Iha fatin hanesan, tuir Sekretariu Jerál partidu KHUNTO, Jose Agostino hatete, to’o ohin loron Primeiru Ministru mos seidauk eleitu tanba Partidu Koaligasaun la husu kargu ministériu atu assume maibé tuir direitu preorogativu Primeru Ministru indizitadu mak sei hili.

Entretantu, Vise I Presidente Partidu FRETILIN, Francisco Miranda Branco reforsa tan katak, FRETILIN laiha tan kandidatu seluk tuir baze legal estatutu partidu nian. Ne’eduni Sekretáriu Jerál Partidu FRETILIN Mari Alkatiri mak tenki asumi duni kargu nuudar Primeiru Ministru.

“Estatutu mak hateten nune’e duni. Kuandu FRETILIN manan Mari mak tenki sai PM, laiha tan ona desizaun seluk buat hotu la’o tuir de’it baze legal estatutu partidu nian,”dehan Xefe Bankada FRETILIN ne’e.