Molok ne’e Governu halo ona kontratu ho Air North hodi tula sasan umanitaria no amostra suspeitu Covid-19 nian ba Australia, tuir kontratu ne’ebé kada semana aviaun ne’e semo mai Timor-Leste dala tolu, kada vou Governu selu osan rihun U$15 dollar Amerikanu.

Tuir observasaun INDEPENDENTE Online nota katak, iha loron kuarte (03/6) aviaun Air North ho númetu flight TL0510 husi Darwin mai tuun iha Aeroportu Internasionál Nicolao Lobato Komoro iha oras, 11:30, ne’ebé deskonfia tula sasán laos material Covid-19.

Dos ne’ebé segel metin hakerek iha sasan nia lolon, Maluk Timor,   Attn; Dr Bethany Beckett, ne’ebé enderessadu ba (hakerek iha dos nia lolon) naran Rui de Araujo, CIGC-COVID-19, CCD, Dili.

Sasan hirak ne’e to’o iha Aeroportu, sasan balun enderesu ba (hakerek iha dos lolon) naran diplomata Timor-oan ida Domingos Savio no sasan ne’e simu direita husi eis Embaixadór Timor-Leste ba Australia ho naran Abel Guterres, ne’ebé tula sai sasan husi aeroportu ho karreta estadu modelu avanza ho koor verde, mai direita iha apartamentu Beach Garden, Pantai-Kelapa.

Aviaun ne’e mós tula sasan koper metan boot maizumenus ho medidas metru ida hanesan ne’e.

Alende ne’e tuir dadús ne’ebé INDEPENDENTE rekoilla katak, aviaun Air North  ne’e tula mós sasán eletronika hanesan telefone ho marka samsung, hamutuk 81 pieces, ne’ebé tula sai husi aeroportu husi kompañia DHL.

“Tuir dadús ne’ebé maka ami iha ohin avian Air North ne’e la tula sasan Covid-19 nian, maibé tula de’it sasan privadu husi Australia no sasan kompañia nian de’it,”dehan husi funsionariu Aeroportu ne’ebé lakohi fó sai nia identidade.

Entretantu too notisia ne’e publika, INDEPENDENTE Online seidauk hetan konfirmasaun husi naran hirak ne’ebé hakerek iha dos lolon husi Australia mai Dili.

Molok ne’e, Ministru Transporte no Telekomunikasaun, José Agostinho rejeita ona katak aviaun Air North ne’ebé kontrata husi Governu la tula sasan privadu.