Koordenadór ne’e hatete, hala’o enkontru ho Primeiru Ministru Kay Rala Xanana Gusmao hodi hato’o progresu servisu no dezafiu sira ne’ebé durante ne’e sira hasoru.

Nia dehan, iha sorumutu ne’e ko’alia mós kona-ba orsamentu ne’ebé limitadu tebes, tanba projetu rezolusaun ne’ebé aprova husi Konsellu Ministru (KM) katak tenki uza de’it orsamentu husi Rejiaun Administrativa Espesial Oe-Cusse Ambeno (RAEOA) nian.

“Ami ko’alia oituan kona-bá ami nia orsamentu ne’ebé limitadu tebes, hanesan imi hotu hatene projetu rezolusaun ne’e aprova husi Konsellu Ministru dehan iha ne’ebá ami mós uza orsamentu RAEOA nian, ho ida ne’e hanesan kustu ne’ebé elevadus no orsamentu RAEOA fundus la sufisiente atu kontepla ba ida ne’e,” dehan Koordenadór ba Jornalista sira hafoin hasoru malu ho PM iha Palasiu Governu, Sesta (21/06).

Kona-ba progresu servisu, nia dehan, bazeia ba estudu ne’ebé komisaun ezekutiva halo Estabelesimentu Zona Ekonomika Espesial Oe-Cusse Ambeno iha progresu di’ak.

“Kona-ba progresu servisu, komisaun ezekutivu ne’ebé mak halo estudu kona-ba estabelesimentu Zona Ekonomika Espesial Oe-Cusse Ambeno, ami iha progresu ne’ebé di’ak hanesan imi hotu hatene iha iha tinan ida para remata ami-nia servisu,” katak Koordenadór.

Tuir nia, dezafiu ne’ebé sira hasoru mak menus rekursu tan ne’e sei buka atu rezolve liu husi proposta orsamentu ne’ebé hato’o ba Primeiru Ministru.

Hatan ba prekupasaun ne’e, Primeiru Ministru mós konkorda katak sira iha duni limitasaun orsamentu, tanba ne’e xefe governu mós prontu atu rezolve, maibé husi sira atu hatama proposta konaba lamentasaun hirak ne’e.