Ministru Obras Públikas (MOP), Samuel Marçal hatete, nia parte hasoru Primeiru Ministru Kay-Rala Xanana Gusmão hodi hato’o relatoriu servisu nia, no vizitasaun Amu Papa nian inkliu Estrada sira seluk ne’ebé estragus husi udan boot.

Ministru dehan, projetu Estrada hotu-hotu iha Dili laran atinji ona pursentu 50 (50%), nune’e trajetu ba konstrusaun hirak ne’e garantia katak iha loron ikus fulan-Agustu nian bele remata ona.

“Ita atu dehan katak tékniku hotu-hotu atinji ona 50% tanba ita target ba konstrusaun sira ne’e depois de fim de Agustu bele garantia katak bele remata ona,” dehan Ministru ba Jornalista hafoin atualiza progresu konstrusaun sira bá Primeiru-Ministru (PM), Kay Rala Xanana Gusmão iha Palásiu Governu, Sesta (21/06).

Iha biban ne’e, Ministru ne’e mós klarifika kona-ba fatin sira ne’ebé foin lalais hetan despezu administrativu hosi Sekretária Estadu Asuntu Toponímia Organizasaun Urbana (SEATOU), liu-liu iha área Bidau nian, daudaun ne’e ekipa halo hela mobilizasaun materiál atu hahú konstrusaun.

Nia parte ko’alia ona ho SEATOU katak molok sobu fatin sira iha área tasi-ibun no fatin sira seluk presiza halo koordenasaun didi’ak ho tékniku MOP nian atu prepara uluk dezeñu, nune’e sobu hotu avansa kedan ho konstrusaun.

“Problema duni tanba derepente SEATOU sobu tiha foin haruka obras públika halo ne’ebé ami la’os to’o ba halo kedas ita presiza dezenhu halo didiak ne’ebé ha’u mós ko’alia ona ho SEATOU antes atu ba sobu besik sobu tasi-ibun koordena didiak lai ho tékniku ho obras públika hodi prepara dezenhu antes sobu hodi halo fali konstrusaun,” dehan Ministru.