Tanba ne’e, nia garante katak, konstrusaun ne’e sei remata iha fulan-Agostus tinan ne’e.
Nia dehan, ba konstrusaun ne’e responsavel husi kompañia Timoroan ida ne’ebé naran Hadezta,Lda no dadaun ne’e konstrusaun refere, besik iha ona faze taka kalen no plester.
"Ita nia sentru formasaun ba ema ho Difisiensia Matan iha Tibar dadaun ne'e to'o ona pursentu 50 no besik ona atu ba pursentu 60, no ha'u fiar katak to'o agustu ita bele halo inagurasaun ona, tanba ita nia traballador sira dadaun ne'e servisu makaas hela," dehan nia ba Jornalista Online INDEPENDENTE, iha knar fatin Manleuna Kuarta, (21/06).
Diretor haktuir, konstrusaun refere ho medida 12 x 22 ne'ebé fahe ba sala de aula Ualo (8) no sei sai hanesan sentru Nasionál ida hodi halibur ema ho Difisiensia Matan iha Timor laran tomak.
Enkuantu, konstrusaun sentru formasaun refere hahú ona iha fulan-Marsu tinan ida ne'e (2023)
Nia dehan, bainhira kontrusaun ba sentru formasaun ne'e remata mak AHDMTL sei loke formasaun ba EhD Matan hanesan, formasaun lian inglés no Português, formasaun kona-ba letra braille, lideransa no komputador báziku.
Enkuantu, orsamentu ne'ebé aloka ba konstrusaun refere hetan apoiu husi Governu Japaun liu-husi embaixada Japaun iha Timor-Leste ho montante hamutuk dolar amerikanu rihun $92.
