Diretór Ezekutivu ADTL Cesário da Silva hatete, ADTL hanesan organizasaun ida ne'ebé servisu hodi promove no proteje direitu Ema ho Difisiensia (EhD) no ADTL nia papel importante ida mós atu asegura direitu Ema ho Difisiensia nian hodi hetan protesaun no promove iha sosiedade nia leet.
"Tanba ne'e, ami nia esperansa ba governu foun ne'ebé atu mai, husu atu tau aas interese komum liliu EhD nian, integra asuntu difisiensia hanesan iha dezenvolvimentu nasional. Ida ne'e mak ita nia intensaun boot liu ba governu foun no tenki implementa polítika direitu Ema ho Difisiensia," dehan nia ba Online INDEPENDENTE, iha knar fatin, Maskarenhas, Balide, Dili, tersa (20/06)
Ezekutivu ne’e hatutan, governu foun ne'ebé mai, tenki implementa polítika hirak ne'ebé iha ona, liga ho asuntu difisiensia no labele husik ema ida iha kotuk liliu EhD sira.
Nia dehan, Ema ho Difisiensia sira tenki faz parte iha prosesu dezenvolvimentu nasionál atu nune'e bele hetan benifisia direita.
Tanba, prosesu dezenvolvimentu iha setor oioin hanesan edukasaun, saúde, ekonomia no finanseira, ne'e EhD tenki faz parte hotu, tan ne’e aloka mos rekursu oioin ba sira.
"Tanba ita koalia kona-ba sidadaun la'os Sidadaun ne'ebé la ho difisiensia de'it maibé difisiensia hotu, aloka rekursu ba EhD hanesan rekursu humanu, finanseira materiais atu asegura hodi implementa polítika sira ne'ebé iha relasaun ho asuntu difisiensia," nia hato'o.
Enkuantu, dadus Ema ho Difisiensia iha Timor-Leste tuir Sensus 2015 hamutuk 38.813 no iha tinan 2022 dadus ne'ebé ADTL iha sa'e ba rihun 93 EhD.
Husi dadus ne'e, iha rihun 17 mak konsidera hanesan dupla difisiensia ne'ebé presiza tebes asistensia, tanba labele mobiliza mesak ba fatin seluk.
