Inisiativa ida ne’e ho objetivu atu promove beleza naturál ne’ebé koñesidu no moris vibrante tasi okos, hodi hasa’e liu tan pozisaun Timor-Leste hanesan destinasaun luku ida. Mapa luku ida ne’e subliña lokalizasaun balu ne’ebé di’ak liu iha Timor-Leste, hodi konvida mergullador sira hodi haree esplorasaun riku tasi okos nian.
Mergullador sira bele antisipa hasoru malu ineskisivel ho riku tasi okos nian, hanesan ikan tropikál, lenuk no ahu ruin ne’ebé vibrante no saudavél.
Kolaborasaun entre MDF no DOWG mak esforsu boot ida hodi promove dezenvolvimentu turismu sustentável iha Timor-Leste, inklui prátika luku ho responsavél no konservasaun ambiente mariña nasaun ida ne’e nian.
“Snorkelling no luku iha ahu ruin biodiverso mak razaun prinsipál ida hodi vizita Timor-Leste. MDF kontente bele servisu hamutuk ho DOWG hodi proteze no promove turismu mariña, inklui kriasaun ba mapa luku ida ne’e. Ami espera katak turista internasionál sira sei vizita Timor-Leste iha tinan hirak mai,” hateten Drew Johnson, Country Director MDF, iha komunikadu ne’ebé Online INDEPENDENTE sita, segunda (19/06).
“Kolabora ba projetu ne’e hamutuk hanesan industria lokál laos de’it ho operadór sira, fó fundasaun ida metin ba konsisténsia sitiu luku nian. Ida ne’e garante katak bainhira sentru luku nian loke tan iha futuru, sitiu hirak ne’e koñesidu ona ba ema hotu ho naran ne’ebé hanesan.
Country Director MDF hatutan, ida ne’e, elementu xave ba lokál no turista sira hodi hatene fatin ne’ebé sira bele luku ka fatin ne’ebé mak sira luku ona, liliu iha relasaun ho mergullador sira ka postajen saida mak sira haree iha media sosiál.
“Ida ne’e, permite ema atu deskobre opsaun oioin husi sitiu sira ne’ebé operadór luku nian iha Timor-Leste bele fornese,” hateten said Kate Barker, membru DOWG husi Dreamers Dive Academy.
Entretantu, lansamentu ba mapa luku ida ne’e aprezenta pontu prinsipál ida ba dezenvolvimentu industria turismu mariña. Operadór luku sira, ajensia viajen nian no aventura sira bele esplora no deskobre segredu valor beleza iha mundu tasi okos Timor-Leste nian.
Enkuantu, DOWG sei utiliza mapa ida ne’e ba kampaña marketing hodi atrai mergulladór foun sira mai Timor-Leste.
