Enkuantu, traballador hirak ne'e balun sei aranka iha loron 26 fulan Juñu no balun iha loron 05 fulan-Jullu tina ida ne'e.
Diretór DNEE Filomeno Soares hatete, Sekretariu Estadu Formasaun Profesional no Empregu (SEFOPE) hakarak inan-aman sira tenke asina deklarasaun ida ne'e ho oan sira hodi ba servisu iha Australia durante tinan haat.
"Ita kontinua mobilizasaun nafatin traballador Timoroan sira ba servisu Australia no Programa sesional nia, konsege haruka ba Australia ho tinan naruk kuaze na'in 41," dehan Diretor DNEE ba Jornalista INDEPENDENTE iha knaar fatin Becora, Kuarta,(21/06)
Nia haktuir, traballador ho inan-aman sira mai asina deklarasaun ida ne'e hodi hein taballador viajen ba servisu iha Australia.
Traballador balun servisu iha Australia ho durasaun fulan sia no balun ba to'o tinan haat nia, nune'e sira mantein no kuidadu nafatin sira saude hodi prosesu tuir mai kontinua servisu Australia.
DNEE mos hato'o menjasen ba traballador ne'ebe hetan ona oportunidade, da-uluk sira ba tenke kumpri kontratu ne'ebé ohin asina ona iha deklarasaun ne'e.
"Maibé traballador sira tenke kumpre regras ho regulamentu hodi obedese ba servisu ne'ebe husi kompaña Australia fo imi atu servisu iha ne'eba," nia hato'o.
Nune'e mós, DNEE husu ba traballador sira la bele sai ilegal iha Australia, bainhira sai ilegal iha ne'eba sai prejudika ba nia a'an rasik, ba familia no mos ba nasaun.
Tanba ne'e, governu liu husi Sekretariu Estadu Formasaun Profesional no Empregu (SEFOPE) ho Diresaun Nasional Empregu no Exterior (DNEE) kria programa ne'e hodi fo oportunidade ba Timoroan atu aproveita didiak, nune'e bele fó benifisia ba sira, ba nasaun no mós sosiedade.
Ho nune'e, DNEE husu ba traballador na'in 41 tenke kuidadu saude no husu ba familia apoiu nafatin fó moral no Korajen ba sira atu mantein iha servisu fatin.
"Ita fó hanoin ba traballador sira tenke kumpri regras no regulamentu sira ne'ebe aplika ona iha sistema, nune'e imi la bele kontra regras sira ne'e," katak nian
Nia haktuir, traballador na'in 41 ne'e tenke servisu iha Australia kuidadu a'an bainhira ba servisu fatin, tanba ba buka osan hodi fila mai hodi sustenta familia nia nesesidade.
"Ho deklarasaun ida ne'e hodi hato'o ba imi hotu, molok atu sae aviaun iha Aeroportu Nicolau Lobato Comoro ba tun iha Aeroportu Australia nia la bele halai sai husi sistema atu labele prejudika ba imi nia a'an," nia hameno
