Liu husi peskiza ne’ebé Konsellu Imprensa halo, identifika ona blog ida ho naran politikatimor.blogspot.com nu’udar média falsu ne’ebé relata informasaun la bazeia ba faktu no realidade.
“Husu ba públiku tomak ka sidadaun hotu-hotu atu labele fiar “fake news” sira ne'ebé média sosiál, politikatimor.blogspot.com divulga. Ida ne’e nu'udar propaganda baratu atu soran ita-nia lider sira iha ambiente polítika daudauk ne’e”, dehan Prezidente KI, Virgílio Guterres, liu husi konferénsia imprensa iha salaun KI, Kintál Boot-Dili, horisehik.
Tuir nia, Konsellu Imprensa nu'udar entidade ida ne'ebé reguladór imprensa, hala’o ninia knaar ka atribuisaun ho kompeténsia ne'ebé la submete ba diresaun ka orientasaun sira husi podér polítiku sira nian, ho misaun prinsipál mak atu promove liberdade espresaun no liberdade imprensa iha rai laran.
Rezultadu Observasaun Kobertura Eleisaun
Nune’e, KI mós fó sai rezultadu observasaun durante média nasionál sira hala’o kampaña eleisaun parlamentár períodu 2017-2022.
Observasaun ne'ebé KI hetan maka média nasionál sira uza sistema cover boat iha notísia barak no laiha konfirmasaun ho fonte importante sira.
Prezidente KI dehan, kestiona kona-ba publisidade boot balun maka média privadu sira fó sai liu husi partidu boot ne'ebé iha rekursu finanseiru makaas.
Tanba ne’e, Virgílio rekoñese KI rasik seidauk iha lei ida atu regula kona-ba publisidade partidu polítiku sira nian, maibé foti sai hanesan referénsia no rekomendasaun ba PN foun atu estuda.
Lamenta Tranzmisaun Apuramentu Nasionál
KI lamenta mós ho servisu Radio Televizaun Timor Leste (RTTL) ne’ebé la halo tranzmisaun direita ba rezultadu apuramentu nasionál ba eleisaun parlamentár nian.
Virgílio bolu atensaun ba RTTL nu’udar média Estadu, iha obrigasaun étika atu tranzmite diretamente rezultadu apuramentu nasionál iha eleisaun parlamentár.
Nune’e, públiku tomak bele hatene prosesu apuramentu nasionál rasik husi Comissão Nacional Eleições (CNE) bainhira hamosu diskriminasaun ruma iha apuramentu ne’e.
“Kuaze loron tolu prosesu ne’e la’o, laiha tranzmisaun direta husi RTTL”, tenik nia.
Nia esplika tranzmisaun direta kona-ba prosesu apuramentu nasional nu’udar dalan di'ak liu atu bele kontra rumor no notísia falsu sira ne'ebé ema irresponsavel sira divulga iha média sosiál. Nune’e, bele halakon duvida sira ne'ebé mosu iha komunidade nia leet durante prosesu apuramentu nasionál la’o hela.
