Vise-Prezidente PLP, André da Costa Belo ‘L-4’ hateten, PLP mós ohin loron halo hela planu preparasaun ba Kongresu Nasionál nian, maibé seidauk bele determina tempu serteza.

“Ami sei hein hela maun Taur nia mandatu remata iha fulan-Maiu, ami tenke halo ona kongresu nasionál,” tenik nia, iha UNDIL, Sesta (27/1).

Nia hatutan, partidu ne'ebé de'it atu konkorre iha eleisaun jerál, tuir kritériu tenke halo kongresu nasionál hodi define estatutu no hili lideransa sira atu bele kaer partidu ne’e.

Taur sei Sai Prezidente PLP

Tuir L4, mandatu Taur sei remata iha 20 fulan-Maiu. Nune’e, PLP sei entrega kargu Presidente PLP nian ba eis jenerál FFDTL ne’e atu bele lidera partidu ne’e iha futuru.

Tuir nia, kargu ne’e sei la lidera husi jerasaun ne'ebé de’it, maibé ne’e sei fó ba Taur atu okupa tanba nia hanesan jerasaun tuan ne'ebé idade sei produtivu atu bele kontribui nafatin ba konstrusaun estadu ne’e.

“Ami nia planu ne’e hakarak ka lakohi mós Maun Taur mak sei sai presidente ba partidu PLP, ne’e ami garantia katak nia mak sei lidera,” tenik nia.