DILI: Xefi Governu Xanana Gusmão fo alarma, iha tempu besik sei bolu lider Artemarsiais no Arte Ritual sira ne’ebé ejiste ha Timor-Leste, atu bele esplika doutrina Artemarsiais nian.

“Ha'u avizu kedas ba Xefi do Grupu Artemarsiais hotu hotu, prepara ha'u sei bolu sira hotu, atu husu los ba sira, hanorin Arte saida mak, estraga fali labarik sira sa Arte saida mak hanesan ne’e?,"afirma PM Xanana Gusmão, relasiona ho konfrontu anarkia iha Lorba, Munisipiu Bobonaro.

Xefi Governu ne’e dehan, atividade grupu Artemarsiais no Arte Ritual sira, uluk taka ona, maibe iha Governasaun anterior deside loke fali, no halo lei apoiu tan orsamentu ba grupu Artemarsiais mo Arte Ritual sira maibe, joven sira kontinua estraga malu.

“Uluk taka tiha Governu foin dadaun ne’e mak loke fali, ha'u ba deskute iha Orsamentu ne’eba hare ba hare mai, osan bo’ot ba sira, mais la halo buat ida, ba fali estraga ema no ema nia uma sira,”Xanana dehan.

Konfrontus entre joven sira iha Suku Lourba, no Suku Karabau Postu Administrativu Bobonaru Munisípiu Bobonaru iha Loron 3 Fulan Novembru ne’e, rejulta uma kuaze sanulu resin hetan sunu, no ema na'in hitu kanek todan.