Tuir informasaun ne’ebé jornalista INDEPENDENTE hetan husi autoridade lokal aldeia Lebulelo, konfrontu entre membru Persaudaraan Setia Hati Terate (PSHT) ho IKS-PTL hahú iha Sesta (11/09) kalan no kontinua mosu iha Sabadu (12/09) dader ne’ebé rezulta ema na’in rua kanek.
Nia hatete, konfrontu ne’e mosu bainhira grupu joven balun husi Dili ba partisipa iha festa kazamentu ida iha Lebulelo, Tibar.
Iha festa ne’e, nia hatete, hahú mosu provokasaun ba malu no ikus mai dada to’o grupu artemarsiais no hahú hamosu konfrontu entre membru PSHT no IKS.
“Asaltu malu ida ne’e ita labele bosok joven mai husi grupu arte masiais Persaudaraan Setia Hati Terrate ho Inkatan Kera Sakti,” informa Xefe Aldeia Lebulelo Domingos Serão Fatima da Conceição via telefone, Domingu (13/09).
Xefe Aldeia ne’e hatete, konfrontu entre grupu rua ne’e rezulta uma rua hetan estragus no ema na’in rua mak hetan kanek.
“Joven sira asaltu malu hodi rezulta uma rua hetan estragus no joven ida naran bolu Ady hetan tuda no ida seluk naran Ricardo deskonfia okmun polisia mak tiku kanek,” dehan Domingos.
Entretantu, jornalista INDEPENDENTE koko konfirma asuntu ne’e ho autoridade seguransa, maibé Komandante PNTL Munisipiu Likisa Superintendente Polisia Umbelina dos Santos Soares lakohi fó kometariu, tanba relatoriu haruka ona ba Komando Jeral PNTL.
“Kazu ne’e akontese asaltu malu entre joven husi Persaudaraan Setia Hati Terrate ho Inkatan Kera Sakti iha aldeia Lebulelo, Suku Tibar, Postu Administrativu Bazartete, Munisipiu Likisa, maibé hau labele koalia, tanba aban komandante Jeral PNTL sei halo konferensia imprensa,” dehan nia.
