Kestaun ne’e hato’o relasiona ho Saudozo Renan Selak ne’ebé mate iha iha HNGV hafoin halo tratamentu saúde durante semana ida nia laran.
Veteranu husi munisipiu Lautem, Jhon Miranda “Aluk Deskartes” (Maun husi matebian Saudozo Renan Selak) hatete, veteranu sira nia mate ne'e maioria parte husi moras komplikasaun no HNGV laiha kondisaun no kapasidade atu fó asistensia ida ne'ebé bele asegura veteranus sira-nia vida.
"Preokupasaun ida ne'e hatudu bebeik no kestiona bebeik, laos husi ita reziaun Ponte Leste de’it maibe reziasun seluk mós kestiona atu oinsa mak estadu atu halo atendimentu di'ak ba veteranu sira," dehan nia iha Lospalos, Sabadu (12/09).
Maske nune’e, nia hatete, la signifika katak governu taka matan ba veteranu sira, katak governu iha planu no programa, maibé prosesu atu dezenvolve ne’e mak sei neneik.
Entretantu, Aluk Deskartes informa, veteranus ne’ebé luta iha ailaran durante tinan 24 husi ponta leste hamutuk na’in 83, husi númeru ne’e na’in 54 mai husi Lospalos.
Husi na’in 54 ne’e, nia hatete, iha veteranus na’in 7 mak mate ona, hanesan Kasimiro, Mauk Lisin , Domingos Funu Kiak, Karat, Hikis Mau, Oli Lemorai no foun liu mak Renan Selak.
Renan Selak sei Haloot iha Lautem
Entretantu, iha Sesta (11/09), saudozu Faustino dos Santos “Renak Selak” nia mate isin to'o ona iha ninia hela fatin iha Munisipiu Lautem, no tuir planu saudozu sei haloot iha Tersa (15/09) iha osoariu Lautem.
"Ddesizaun ne'ebé mak nia oan mane na’in tolu foti, matebian nia isin sei haloot iha osuariu Munisipiu Lautem iha Tersa-feira," dehan Veteranu Jhon Miranda “Aluk Deskartes”.
Nia hatutan, nu'udar eis gerileiru, loloos matebian haloot iha Jardin eroi Metinaru, maibé husi parte familia hili liu atu haloot iha saudozu nia rai moris fatin.
Aluk Deskartes hatete, Sekretariu Estadu Asuntu Veteranus mós aseita atu haloot saudozu iha ssoariu Lautem.
"Ha'u hakarak fó sai ba publiku tomak, liu-liu ba veteranu sira ne'ebe mak rona ona saudozu ninia mate katak, husi familia tomak ho laran luak konvida ita-boot sira ho instituisaun sira hotu, atu hakmaan an hodi mai partisipa iha ninia serimonia funebre," nia husu.
