Jestór ANKT Sancho Belito Fernandes hatete, Timor-Leste iha dekretu lei kontrolu tabaku númeru 14/2016 hodi bandu fumadór sira labele fuma sigaru iha fatin públiku sira. Tanba ne’e Institutu Apoiu Dezenvolvimentu Emprezariál (IADE) konvida ANKT hodi fahe informasaun ba sira atu bele lansa bandu fuma iha servisu fatin.

“ Tuir dadus ANKT nian sidadaun pursentu 74 maka la kumpri dekretu lei hodi bandu fuma sigaru iha fatin públiku sira entaun presiza sensibiliza informasaun ba públiku ho rutina” dehan nia iha IADE Mandarin, Sexta (10/09).

Nia hatutan katak, dekretu lei ne’e implementa ona entaun ba sidadaun hotu-hotu iha obrigasaun atu kumpri liu-liu funsionáriu públiku sira. Tanba ne’e instituisaun públiku sira presiza implementa uluk hodi hatudu dalan ba fatin sira seluk hanesan iha restaurante sira hodi bele halo tuir.

Entretantu, Diretór Ezekutivu IADE Filomeno Marcelino Belo hateten, konvida ANKT mai fahe informasaun ne’e hodi fanun konsiensia ema idak-idak nian atu bele fuma iha fatin ne’ebé loos hodi labele fuma arbiru iha areadór edifísiu nian.

 Nia husu ba funsionáriu sira katak la kumpri regra ida ne’e sei fó sansaun ba sira hodi multa ho osan. Tanba ne’e administrasaun jerál instituisaun nian sei prepara sansaun ne’e hodi kua saláriu.