DILI: Eis-Prezidente Republika Timor-Leste, hanesan mós Prezidente Partidu Fretilin, Francisco Guterres Lú Olo, ne’ebé hala’o hela tratamentu iha Óspital Nasional Guidu Valadares (HNGV), iha loron hirak nia laran, maibé dadauk ne'e nia kondisaun iha mudansa.
Tuir informasaun ne’ebé Online INDEPENDENTE simu, husi parteira balun iha HNGV, ne’ebé husu atu labele fó sai nia identidade haktuir katak, dadauk ne’e, Eis-Prezidente Republika Francisco Guterres Lú Olo nia kondisaun normal, nune’e hein deit, atu halo trensferensia ba Malazia hodi halo chek-up.
"Agora Doutor sira halo ona karta, hein deit ona hodi halo tranferensia ba rai liur, tanba ema bo'ot, sira tenke halo tranferensia para hodi halo chek-up ba nia saude,"dehan fontes refere iha HNGV,Bidau-Toko Baru, kinta ne’e (15/09).
Nia haktuir, Eis-Prezidente Republika ne’e, nia kondisaun iha mudansa ona, maibé nia liman rua ne’e mak senti sei kolen hela.
Mediku ne’e dehan, dala ruma mós tanba Eis-Prezidente ne’e viajen hela deit, ida ne’e mós bele halo ninia saúde fraku.
Nune’e, bainhira Jornalista Online INDEPENDENTE, husu atu intervista ho mediku ne’ebé hala’o hela pikete iha sala baixa Francisco Guterres nian, maibé, sira la fó komentariu kona ba kondisaun pasiente nian.
Tuir mediku ne’e katak, pasiente rasik la hatan atu jornalista halo intervista no lakohi atu publiku hatene kona nia kondisaun.
Nune’e mós mediku ne’e dehan, ohin dader mediku espesial sira mai halo ona chek-up ba pasiente, maibé ninia kondisaun oinsa? Sira mós seidauk hatene no lakohi atu fó sai.
Enkuantu, tuir observasau husi Online INDEPENDENTE iha terenu nota katak, Eis-Prezidente Republika hala’o tratamentu iha Sala VIP Unidade Espesial Enternamentu nian no hetan seguransa maximu husi Unidade Espesial Polisia. Aleinde ne’e, iha mós familia sira, mak dadauk ne’e hein hela pasiente.
Iha fatin hanesan, seguransa UEP na’in ida, ne’ebé halo mós seguransa ba Eis-Prezidente Lú Olo, bainhira sai mai liur, koko dadalia ho Jornalista Online INDEPENDENTE, haktuir katak, Eis-Prezidente Lú Olo nia kondisaun diak no estavel, agora depende ba Doutor sira hodi halo analiza nune’e bele halo transferensia.
Nia dehan, aimoruk ne’ebé atu fó ba pasiente mós laiha, sira ba sosa iha klinika sira Dili laran.
“Aimoruk iha ne'e mós laiha, ami ba buka fali hodi sosa ne'e, ami ho familia sira mak hein ita nia Avo Lú Olo, ami fó seguransa troka malu deit," seguransa ne’e dehan.
Nia konta tuir katak, fofoun lori Eis-Prezidente Lú Olo ne’e ba HNGV ba liu iha fatin chek-up nian, hafoin ne'e, mediku sira deside lori pasiente mai iha Sala VIP hodi halo tratamentu.
Entrentantu, José Manuel da Silva, hanesan kleaner ne'ebé servisu iha HNGV, sente triste no sokadu bainhira haree kondisaun lider ba luta na’in Francisco Guterres Lú Olo ne’ebé durante ne’e terus ba ukun-aan, agora baixa hela iha HNGV.
"Sente triste tanba ita nia lider sira ne'e hetan kondisaun moras, ne'e ita hare triste tebes, ita ladún kontente, derepende deit nia moras, maibé maromak hein tulun nia," dehan nia.
Tanba ne'e nia espera katak, maromak sei tulun Eis-Prezidente ne'e, atu nia kondisaun bele rekopera fila-fali hanesan babain.
Enkuantu, Eis-Prezidente Republika Francisco Guterres Lú Olo, hahú halo tratamentu iha HNGV, iha tuku 09:00 dader otl, loron 12 Setembru tinan ne’e.
