“Programa sesta bázika agora, ministeriu implementador sira halo hela prosesu, atu atribui ba iha kompañia ne'ebé selesionadu, tuir informasaun no relatoriu ne'ebé sira fó sai, iha fulan setembru nia laran kontratu hotu-hotu konklui ona,”dehan nia, iha Palasiu Governu, kuarta horseik (14/09).

Nune’e, bainhira kompañia sira ne’ebé selesionadu sira konklui ona, iha fulan setembru nia laran halo kedas distribuisaun sesta bázika ho eskala ne’ebé boot tuir kalendariu ne’ebé iha.

Entretantu, Governante ne’e dehan, ba kompañia selesionadu, nia seidauk bele hatete sai, tanba dadauk ne’e prosesu ba selesaun ne’e iha hela ministeriu implementador sira.

Enkuantu, tuir dadus ne’ebé Online INDEPENDENTE, asesu iha pajina MTKI, total benifisiariu sira ne’ebé asesu ona ba sesta bázika iha Munisipiu Atauro hamutuk 11.588 benifisiariu, Líkisa iha Suku Dato benifisiariu 9.513, Ermera iha Suku Poetete benifisiariu 11.768 no Bobonaro iha Suku Ritabou benifisiariu hamutuk 7.768.

Nune’e mós iha Kapital Dili, iha Suku Komoro, iha aldeia neen hanesan Baia-Leste, Fomento I-III, Naroman no aldeia Golgota, total benefisiáriu 14.668.

Enkuantu, iha loron 14 setembru 2022, MTKI notifika tan kompañia 12 ne’ebé sei halo distribuisaun sesta bázika ba suku sira iha munisipiu Ermera, Líkisa no Bobonaro ne’ebé antes ne’e seidauk fahe.