Enkuantu, distribuisaun sesta bázika ne’e Governu liu husi Ministeriu Turizmu Komérsiu no Indústria (MTCI-sigla portugés) kontrata empreza lokál ZYAHFAST Unipessoal Lda. hodi sai hanesan ajente distribuidor kabazes sesta bázika ba komunidade sira.

Tuir kontratu ne’ebé iha empreza sei fahe ba aldeia tolu hanesan aldeia Moris Foun aproximadamente 556 benefisiáriu, Mota Quic aproximadamente 2.492 no aldeia Sucaer Laran benefisiáriu hamutuk 1.011 benefisiáriu, totál benefisiáriu ne’eé mak sei simu hamutuk 4.059.

Diretór empreza ZYAHFAST, Januario Agostinho Pereira, afirma katak, antes fahe sesta bázika ba komunidade, dahuluk iha kordenasaun uluk ho Xefi Suku kona-ba produtu ne’ebé mak atu distribui ba komunidade hamutuk item 17.

“Maioria produtu ami foti husi Lokál, ikan maran ami sosa husi Atauro, koto no foremungu sosa husi Suai, batar sosa husi Natarbora, talas feuk husi Venilale, item ho pursentu sanulu resin hitu (75%) mai husi lokál. Durante ne’e ami tun sosa sasan povu agrikultór sira kontente tebes. Ha’u senti kontente tanba husi programa ne’e bele benefisia ona ami kompaña no povu agrikultór sira,”Online INDEPENDENTE sita iha komunikadu.

Entretantu, komunidade Rosito Fraga husi aldeia Mota Quic suku Hera, sente kontente tanba produtu hirak ne’e mai husi lokál.

“Ami nuudar komunidade senti kontente tanba produtu barak mai husi rai-laran, polítika governu nian diak, tanba aihan ne’ebé mak governu liuhusi kompaña sosa tiha husi povu fahe fali ba povu,” benefisiáriu Rosito Fraga, hatete.

Enkuantu, Xefi suku Hera Antonino da Silva, “Agradese ba Oitavu Governu ne’ebé lidera husi jeneral Taur Matan Ruak ne’ebé mak iha hanoin diak atu rekopera ekonomia nasaun liuhusi programa sesta bázika. Ita agradese tanba governu tau matan ba nia povu. Ita haree katak produtu maioria husi lokál tanba ne’e husu ba povu agrikultór atu produz barak liutan produtu rai-laran.”

Xefi Suku Hera, hatete, durante distribuisaun loron rua, komunidade sira laiha preukupasaun no laiha rejeisaun ruma atu simu produtu sesta bázika. Maibé komundade iha preukupasaun barak liu tanba komunidade sira nia naran balun ne’ebé mak latama iha lista benefisiáriu.

“Komunidade balu preukupa mak sira ne’ebé tinan kotuk lasimu, tinan ida ne’e nia naran la tama nafatin iha lista benefisiáriu tanba ne’e kontinua halo reklamasaun.” Xefi Suku hatete.

Iha distribuisaun ne’e, empreza emprega ema na’in 30 maka hodi hala’o servisu preparasaun sosa produtu, pakotadu to’o distribuisaun.