Tuir komunidade Albina Alves hanesan mós vendedor iha Aldeia Metin hatete, nia parte la konfortavél bainhira faan sasan iha dalan ninin, tanba ho kontrusaun estrada ne’ebé seidauk remata halo rai rahun barak no nia sente la seguru.

“Ha’u senti la konfortavél ho estrada ne’e, tanba rai rahun barak no sempre fó fo’er mai ha’u nia sasan, bainhira la rega, ami senti manas, tan ne’e ha’u husu ba boot sira atu halo lalais estrada ne’e,”dehan nia ba Jornalista Online INDEPENDENTE iha Aldeia Metin, Suku Bebonuk, foin lalais ne'e.

Iha sorin seluk, Komunidade Nina Belo mós preokupa tanba konstrusaun estrada ne’e lori tempu to’o fulan neen ona, maibé seidauk finaliza.

Tanba tuir nia, bainhira kompañia sira la rega, halo rai rahun barak no mós iha tempu udan halo tahu barak, nune’e afeita tebes ba sira nia viajen no saúde.

“Ha’u husu ba bo’ot sira atu hadia lalais estrada ne’e, tanba estrada ne’e halo kleur liu, to’o ona fulan 6, tanba rai rahun, bainhira tempu udan estrada ne’e sai tahu de’it, nu’uné,afeta tebes mai ami nia viajen no saúde,” dehan Nina Belo.

Hatan ba preokupasaun ne’e, Xefe Suku Bebonuk, Alfredo da Costa hatete, komunidade sira tenke pasensia hein, tanba konstrusaun ne’e sei iha hela faze primeiru nune’e iha faze tuir mai sei finaliza.

“Konstrusaun estrada ne’e, sei iha faze primeiru ka faze ateru nian no sei iha tan faze tuir mai, ne’ebé,ha’u husu ba komunidade bele pasensia hein no apoiu ba konstrusaun ida ne’e,”hatete Xefe Suku Bebonuk.

Entretantu, ba vendedor sira ne’ebé faan sasan iha dala ninin iha área Aldeia Metin I to’o IV, Xefe Suku ne’e husu ba vendedor sira atu uza maskara bainhira faan sasan iha dalan refere.

“Ha’u  husu mós ba vendedór sira iha estrada ninin ne’e, atu uza maskara bainhira fa’an sasan iha dalan ninin. Ba vendedór sira, sé maka hakarak sei fa’an iha fatin ne’e, pasensia simu konsekuénsia, sé lakohi, ba merkadu ne’ebá, tanba fatin ne’e la’ós fa’an fatin,se hakarak fa’an nafatin besik-besik iha ne’e, só bele faan de’it iha tuku neen lorokraik”.