Nia dehan, ema ho defisiénsia na’in tolu nulu ne’ebé asesu ba ensinu superior, iha tinan ida ne’e kompostu husi mane na’in 14 no feto na’in 16.
“Iha tinan ida ne'e, ita iha benefisiariu nain tolu-nulu maka asesu ba ensinu superior, maibe iha nain rua maka Kansela tanba laiha fundus atu selu rasik,”dehan nia ba Online INDEPENDENTE iha nia knar fatin Masakerenhas, Balide, Dili, Kuarta (04/06/25).
Koordenadór Programa Edukasaun Inkluzivu no Advokasia ne’e hatutan, ADTL nu'udar fontes atu hodi fasilita nia membru ka benefisiariu ne’ebé hakarak asesu ba Universidade sira, maibé la fó apoio finanseiru.
Nia esplika, iha tinan ida ne’e, ensino superior oferese fakuldade rua ba ema ho defisiénsia ne’ebé asesu ba ensinu superior mak hanesan, fakuldade ekonomia, iha departamentu inkluzaun sosial maka hanesan, siensia sosiaos, jestaun, kontabilidade, no mós fakuldade edukasaun hanesan lingua inglés no portugues.
Tipu ema ho defisiénsia ne’ebé hasoru difikuldade iha prosesu aprendijazen maka hanesan, defisiénsia matan no mós tilun.
“Iha prosesu aprendijazen nia laran, tipu defisiensia sira ne’ebé hetan difikuldade barak liu maka defisiente matan,no tilun, nune’e,ADTL prepara makína ba ema ho defisiénsia tilun nian no iha mos tradutora lian jestual nian ba defisiensia matan,”
Entretantu, Koordenadór Programa Edukasaun Inkluzivu no Advokasia iha ADTL, Jesuino Valente S. de Araújo akresenta, husi tinan 2018 to’o 2025, Asosiasaun Defisiénsia Timor-Leste fasilita ona nia membru ema ho defisiénsia na’in 215 maka asesu ba ensinu superior sira iha teritoriu laran tomak.
Nia afirma, tipu ema ho defisiénsia ne’ebé asesu ona ba ensinu superior husi tinan 2018 to’o 2025, maka hanesan ema ho defisiénsia matan, defisiénsia tilun, defisiénsia fiziku no mós balun ne’ebé rekoopera ona husi moras psikososial.
Enkuantu, husi númeru ne’e, balun remata ona sira nia estudu no balun hetan ona servisu iha instituisaun sira no mós balun harii rasik ona organizasaun.
Aleinde ne’e, balun oras ne’e dadaun sei halao ninia prosesu aprendizajen no balun prepara ona atu ba iha graduasaun iha tinan ne’e.
