“Edifisiu foun ne’ebé mak iha Eskola Sekundaria Jerál 05 de Maio, agora dadaun ne’e paradu hela, komesa husi tinan kotuk, ninia prosesu ba konstrusaun ne’e la la’o, lahatene nia problema ne'e saida, parte eskola mós la hatene,” dehan Adjuntu Diretór ESG 05 de Maio, Bekora, Lobato Mota Perreira ba jornalista Online INDEPENDETE, iha nia knar fatin ESG 05 de Maio, Bekora, Dili, Segunda (02/06/25).
Nia dehan, tuir informasaun ne’ebé eskola ne’e hetan katak, kompañia ne’ebé toma responsabilidade ba konstrusaun refere, iha ona prosesu investigasaun no kompañia ne'e blacklist ona, tanba iha problema interna.
Ho konstrusaun ne’ebé paradu, Adjunto Diretór eskola ne’e mós lamenta tebes tanba situasaun ne’e difikulta tebes estudante sira nia prosesu aprendijazen.
Nia afirma, kompañia ne’ebé toma konta ba konstrusaun ne’e mak no naran Kompañia Maluk Unipesoal, Lda no tuir planu konstrusaun ne’e sei termina iha fulan-Outubru tinan 2022. Orsamentu ne’ebé preve ba konstrusaun ne’e hamutuk $355,629,46.
“Tuir kontratu katak kompañia sei konstrui edifisiu ne'e iha fulan neen nia laran, maibé to'o agora seida’uk finaliza, kuaze tinan tolu atu ba haat ona, nia rezultadu laiha. Situasaun ida ne'e difikulta no impede tebes prosesu aprendijazen labarik sira nian,”tenik nia.
Ho nune’e, Adjuntu Diretór eskola ne’e sujere ba Diresaun Obras Publika, iha Ministeriu Edukasaun atu bele tau matan no responde lalais ba kondisaun eskola ne’e, nune’e hodi atinji metas ne’ebé trasa ona iha kurikulum nasional.
Nia akresenta, total sala de aula iha ESG 05 de Maio dadauk ne’e hamutuk 13, tanba ne’e eskola koloka estudante na’in 50 ka liu iha sala ida.
“Tuir planu konstrusaun ba sala de aula foun ualu ne'e remata, ami bele koloka alunos sira tuir padraun Ministeriu Edukasaun nian katak sala ida bele akumula alunus mais ou menus na’in 35 ka 40, kada turma,”Dirijente Eskola ne’e esplika.
Entretantu, tuir dadus, totál estudante ne'ebé oras ne'e dadaun ativa iha ESG 05 de Maio hamutuk na’in 1.346, kompostu husi desimu ano to’o desimu segundu ano no prosesu aprendijezen ne’e fahe tornu rua, dader no lorokraik.
Enkuantu, total professor iha eskola refere hamutuk na’in 53.
