Tanba ne’e Xefe Governu husu ba sidadaun sira atu mantein kalma hodi fó oportunidade ba ekipa liña frente sira halo serbisu mitiga no prevene Covid-19.
Eis Prezidente Republika ne'e subliña, xave ba prevensaun Covid-19 mak komportamentu, no hein vasinasaun ne’ebé daudaun ne’e Governu esforsu hela atu iha vasinasaun ba tempu badak ne’e.
“Hotu-hotu tenke kalma, ne’e importante loos, kalma ne’e importante liu, tanba ita hare ba mai buat ne’e fasil liu, tanba saida, tanba fokus ba ita-nia komportamentu, moras ne’e tuir ita-nia komportamentu, ita bele ko’alia to’o iha ne’ebé de’it mós xave iha buat rua de’it, ida ita-nia komportamentu, ida mak vasina. Ita la halo milagre, vasina seidauk iha presija ema nia komportamentu, taka ibun uza máskara, fase liman, labele halibur malu, kuandu moras ona informa lalais ba saúde, liu ida ne’e la iha”,dehan Xefe Governu kuarta, iha Palasiu Governu.
Xefe Governu hatutan, faktu hatudu tranzmisaun lokál ne’ebé daudaun ne’e iha, mai hosi pasajen ilegál ne’ebé deskontrolu, maske nune'e, Xefe Governu husu sidadaun sira atu keta pániku tanba tranzmisaun lokál ne’e sei iha kontrolu Governu nian.
Tuir dadus atuál Covid-19 iha Timor-Leste, Kinta (18/3) hatudu katak transmisaun lokal kada loron aumenta bebeik, daet husi fatin ida ba fatin seluk, husi ema ida ba ema seluk.
Dadus jeral ba Kinta horsehik, kazu foun na’in 13, rekuperadu na’in 1 no atual baixa iha fatin isolamentu Vera Crus no Tasitolu hamutuk na’in 119.
Sentru Integradu Jestaun Krize (SIJK kontinua husu ba populasaun iha Dili laran tomak atu nafatin kalma, lalika pániku, hela deit iha uma wainhira laiha nesesidade atu halo movimentu bá-mai, pratíka nafatin medida sira ne’ebé ita hotu hatene ona:
- a) Uza máskara
- b) Fase liman bebeik ho sabaun ka dezinfetante ruma
- c) Wainhira kumprimenta malu, lapresiza kaer-liman, bensa-liman, rei-malu ka haku’ak malu
- d) Evita halibur malu barak
- e) Hamri’ik ka tur dook husi ema seluk, mínimu metru ida ho balu.
Editor: Jose Sarito Amaral
