Kordenador Forsa-Tarefa ba Prevensaun no Mitigasaun Surtu Covid-19, Rui Maria de Araújo informa, Ohin loron 18 fulan-marsu tinan 2021 Sala Situasaun Sentro Integradu Jestaun Krize relata, kazu foun na’in 13, iha mane na’in 9 no feto na’in 4, sira na’in 10 laiha sintomas no na’in 3 iha sintomas.
“Kazu konfirmadu hirak ne’e entre idade tinan 11 to’o 12 iha ema nain 2 no idade tinan 18 to’o 50 iha ema na’in 11,”dehan nia liu husi zoom call, CDD (18/03).
Nia esplika, husi kazu foun na’in 13 iha leten, na’in 12 iha munisipiu Dili ho detalla tir mai:
Kazu positivu 2 hetan kontajiu husi professional saúde husi cluster aldeia 05 ho cluster aldeia São Miguel, iha HNGV unidade hemodiálize.
Kazu pozitivu 6, husi Aldeia Avansa, Suku Bairro-Pite, Postu Administrativu Dom Aleixo, Positivu hirak ne’e kontaktu- besik ho kazu positivu iha cluster hanesan ne’ebé anunsia iha loron 16 fulan marsu.
Kazu positivu 1 iha Aldeia Metin 3, Suku Bebonuk, kazu konfirmadu ne’e ba aprezenta an iha HNGV tanba deskonfia iha kontaktu besik ho kazu positivu ida iha Bebonuk.
Kazu positivu 2 iha Aldeia Lirio, Suku Motael, kazu konfiramdu ne’e mós ba aprezenta an iha HNGV tanba deskonfia iha kontaktu besik ho kazu positivu ida iha Bebonuk.
Kazu positivu 1 iha Aldeia Maucocomate, Suku Bekora, Postu Administrativu Cristo Rei, kazu konfirmadu ne’e kontaktu besik iha servisu fatin ho kazu ida iha cluster Aldeia Mate Restu, Suku Vila-Verde.
Ho nune’e, kazu detetadu ka pozitivu iha Munisipiu Dili husi loron 7 to’o loron 18 fulan-marsu hamutuk 95.
Iha kazu positivu 1 husi Munisipiu Vikeke, kazu konfirmadu ne’e professional saúde ida halo kursu iha Postu Laboral iha UNTL, husi Dili ba Vikeke iha loron 8 fulan marsu.
Ho baze ba informasaun foun ne’ebé ekipa konjunta saúde nian rekolla foku ba cluster kazu positivu 95 iha Dili fahe ba cluster 27, namkari iha instituisaun 4, eventu 1, suku 8, fatin kuarentena 1,iha postu administrativu 2.
Dadus jeral ba loron ohin, kazu foun na’in 13, rekuperadu na’in 1 no atual baixa hamutuk na’in 119.
Pandemia Covid-19 ne’e hamate ona ema na’in 2.661.919 iha mundu. Kazu infesaun hamutuk ema millaun 122,7, ne’ebé informa husi agência francesa AFP.
Coronavirus ne’e transmite hahú deteta iha tinan ikus 2019, iha Wuhan, sidade Xina.