Tuir observasaun Jornalista Diáriu INDEPENDETE notak katak, implementasaun Serka Sanitaria semana dahuluk nian hahú iha loron 9 to’o loron 15 movimentasaun públiku ladun iha, maibé agora ne’e aumenta.

Iha Mekarkadu Taibesi ne’ebé antes ne’e komprador menus, maibé oras ne’e hahú rame hikas hanesan loron bai-bain. Iha situasaun ne’e kompradór no negosiante sira maioria la tuir protokolu prevensaun Covid-19 nian, hanesan fase liman ho sabaun, distansiamentu sosial no fiziku.

Iha supermerkadu sira hanesan, Dili Mart, W4, Lita Store, kompradór sira ba sosa sasan balun tama no sai fase liman iha tonera ne’ebé prepara ona, maibé balun fali tama no sai la fase liman.

Entretantu oras ne’e dadaun loza eletronika no konstrusaun sivil no sira seluk ne’ebé la’os faan ai-han iha kapital Dili kontinua ensera provijoriu sira nia atividade.

Haree ba situasaun ne’e, Segundu Komandante Polísia Nasionál Timor-Leste (PNTL), Munisípiu Dili, Superintendente Polisia Euclides Belo hateten, númeru kadetes polísia la to’o atu koloka hodi haree problema ida-ida, tanba ne’e husu komunidade sira nia koolaborasaun ho autoridade lokal sira atu bele ajuda kontrola.

Iha Serka Sanitaria ne’e bandu ema labele halibur malu barak liu, iha bairru-bairru sira, bainhira simu informasaun husi komunidade mak PNTL sei ba hapara.

“Sira ne’ebé mak halo desportu iha tasi ibun, iha jardin sira ne’e ita hapara hotu kedas, depois iha merkadu negosiante ambulante ne’ebé mak iha Bairru-Pité, Kampung Baruh, Audian, ne’e mós hapara hotu,” dehan nia, iha knaar fatin, Kaikoli, Kuarta (17/03).

Euclides dehan, Serka Sanitaria ne’e prolonga tan ona sei to’o iha loron 2 fulan-Abril 2021, ne’ebé husu komunidade iha Dili katak, labele la’o ba mai, husu atu ida-idak mantein distansia sosial, fase liman nafatin, uza maskra bainhira sai ba fatin ruma.