Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Sentru Integradu Jestaun Krize-Sala Situasaun, Dr. Rui Maria de Araújo hateten, regra ba rezolusaun Governu ne’e, ema hotu-hotu tenke hela iha Munisípiu Dili nia laran, labele sai ba-mai, maibé autorizasaun exesionál ne’e Primeiru Ministru bele fó no kompeténsia ne’e delega ba iha Diretór Sentru Integradu Jestaun Krize.

“Sidadaun sira sai ne’e risku, tanba ne’e autoridade sira hamutuk ho komunidade ida-idak maka tenke kolabora atu jere risku ida ne’e,”dehan nia, kinta horisehik.

Nia esplika, kazu exesionál ne’e hanesan, bainhira iha relasaun ho seguransa públiku ba ema hirak ne’ebé seguransa bele sirkula, no iha relasaun ho saúde públika ema ne’ebé servisu iha saúde publika maka bele sirkula, nune’e iha relasaun kestaun umanitária, bainhira atu lori hahán ba fatin ruma ne’ebé ema hamlaha no atu ba fó asisténsia maka iha autorizasaun, iha autorizasaun mós bainhira halo manutensaun mós ba utilidade públika sira hanesan EDTL no SAS sira ne’e maka tama iha kategoria exesionál.

Nia informa, sidadaun Vikeke ne’ebé hetan autorizasaun husi SIJK ba Ossu atu hakoi família mate, daudauk ne’e ba iha fatin ne’e ekipa saúde iha ona orientasaun atu identifika hafoin foti hotu ema hotu nia amostra lori halo teste.

“Daudauk ne’e, sentru Integradu Jestaun Krize, estuda hela posibilidade atu fó autorizasaun de’it ba ema sira ne’ebé prienxe kritériu ne’ebé rezolusaun hateten,” tenik Rui.

Nia hato’o, bainhira sidadaun ne’ebé iha Dili, antes atu sai ba munisípiu seluk maka tenke halo ezame laboratóriu uluk, maibé nia dehan presiza koordena ho laboratóriu nasionál tanba kapasidade atu halo analiza sei limitadu.

“Tanba ne’e, ita presiza foku ita-nia atensaun ka buka tuir ema ne’ebé kontaktu besik hotu husi kazu pozitivu sira,” husik nia.

Antes ne’e, iha Kuarta (17/3), liuhusi konferénsia imprensa, Rui Araújo deklara, ba ema sira ne’ebé atu ba munisípiu ba nesesidade urjente bele halo pedidu ba SIJK. Maibé, laiha kritériu ruma ba ema ne’e tenke halo teste swab.

Bainhira SIJK aseita ona pedidu husi sidadaun ne’e maka nia bele uza karta ne’e nu’udar guia-de-marça hodi halo viajen ba munisípiu.

Entretantu preokupasaun ema balun katak ema sira ne'ebé atu sai husi Dili la presiza hasai Swab Test, ne’e bele fó risku tranzmisaun SARS-Cov-2 (Covid-19) iha munisípiu.

Maski nune’e, kona-ba ema sira ne’ebé sai husi Dili maka pozitivu hodi hada’et virus ne’e ema seluk iha munisípiu, SIJK rasik ‘husik-liman’. Sira lakohi responsabiliza kona-ba tranzmisaun husi ema ne’ebé sai husi Dili tanba sira-nia funsaun halo de’it guia-de-marça.