Ho nia mensajen ne’ebé Online INDEPENDENTE asesu mak tuir mai;

Nudar Secretário-Geral FRETILIN, nudar Fundador, hau senti obrigasaun atu koalia ba povu tomak, ba kuadros no militantes FRETILIN nian tomak.

Ita tama iha Luta foun ida!

Ita nia luta agora, luta ida ho dimensaun nebe'e sasukat laek. Ita funu kontra inimigu ida nebe'e ita buka la hetan, ita subar mos la hetan, tanba la hatene ita subar husi se'e.

Ita fiar ita kontrola hela, maibe'e kontrola sa'ida los. Buat ida ita hatene ona: ita nia inimigu ida ne'e moras ida ne'e perigozu tebes.

Ita rasik, nudar ema moris, maluk matenek nain sira fo ona naran ba nia. Nia naran maka COVID-19. No hatete mai ita hotu atu kuidadu tanba ida ne'e perigosu tebes. Razaun ida ne'e maka halo, iha tempo badak tebes, ita nia inimigu ida ne'e , ida nebe'e ita la hare'e, labele kaer, labele prende, labele oho ho kilat, ka buat kroat sa'ida deit, sai ona inimigu ba umanidade tomak. Lori mai ita moras nebe'e hahu iha Xina, hadaet husi ema ba ema, husi rai ida ba rai seluk, hakat foho, hakat rai tetuk, hakat mota, hakat tasi, husi rai bot ba rai kiik, lori moras ba kintu kantu, ba Rai hotu-hotu. Tanba ne’e bolu Pandemia.

Hanesan hau dehan, virus bele hadaet deit husi ema moris ba ema moris. Atu evita no prevene ita kumpre ho orientasaun mai husi Sistema Saúde ba Mundu tomak (OMS).

Maibe'e, bainhira atu kumpre, ita mos tenki konsiente ho ita nia realidade sosial, kultural, ekonómika no polítika.

Hakarak manan komprensaun no apoio povu nian, no ezemplu tenki mai husi leten ba kraik, no husi sorin ba sorin.

Ita labele dehan ba povu atu uza maskara, bainhira ita la uza, ka uza sala, taka ibun maibe inus nakloke, ka tau deit iha keixu.

Ita labele dehan ba povu atu hamrik dok husi ema seluk, bainhira povu moris iha fatin nebe'e klot kedas ona. No hare'e ita mos la kumpri.

Ita labele dehan atu fase liman ho sabão or-oras, ho be'e mos no iha kadoras, bainhira povu iha nia uma laiha be'e kadoras;

Ita labele dehan ba povu atu labele halibur hamutuk ho ema bar-barak, bainhira ita halo hela nafatin.

Komportamento ba povu atu tuir inklui koalia ba povu nia fuan, hasai todan husi povu nia kabas. Liliu hatudu ita nia komportamentu ida konsistente ho sa'ida maka ita koalia.

Povu tenki fiar ba sa'ida maka ita koalia. Povu tenki senti kaman no fiar katak sa'ida Estado halo, halo atu fo proteksaun ba povu, laos atu lori fali todan foun ba povu. Ne'e maka dalan. La iha seluk.