Diretór Sala Situasaun SIJK, Brigadeiru Jenerál João Miranda “Aluc Descartes” hatete, regras ida-ne’e sei hatur bainhira ema hirak ne’ebé hakarak fila ba moris fatin ou sai husi Dili ba munisipiu sira seluk, nune’e tenki aprezenta an ho rajaun ne’ebé fundamentál no sei halo mós teste Swab ba sira.
“Ezemplu iha Dili Ministériu Ensinu Superiór no Ministériu Edukasaun dehan, ho situasaun serka sanitária kansela ensinu hotu, klaru katak estudante sira nia situasaun ne’e tenki haree didiak atu fila ba munisípiu orijen, hafoin situasaun ida ne’e ita ultrapasa mak sira foin fila-fali mai Dili. Mais antes sira sai tenki ba laboratóriu nasionál hodi halo teste laboratorial antes sira sai, ida-ne’e mak hanoin atu aplika,” dehan nia iha Palásiu Governu (19/03).
Nia informa, regulamentu hirak ne’e, SIJK sei rekomenda ba governu, nune’e bele hatur iha rezolusaun governu nian atu bele sai hanesan baze legál ida bainhira implementa.
Atu fó autorizasaun ba ema ne’ebé atu sai husi munisípiu Dili ba munisípiu seluk, depende sira nia rajaun ne’ebé aprezenta.
Bainhira rajaun ne’ebé sira aprezenta relasiona ho kritériu ne’ebé estabelese iha rezolusaun governu nian nune’e sala situasaun bele autoriza.
Maibé tenki ba Laboratóriu uluk halo teste bainhira ema ne’e hetan negativu bele fó autorizasaun nia sai. Se kuandu ema ne’e hetan pozitivu tenki ba iha izolamentu.
Nia akresenta, iha mós kritériu balun hanesan kazu esepsionál ne’ebé konsideradu nesessáriu liu atu sai mak hafoin SIJK autoriza.
Entretantu tuir rezolusaun governu nian numeru 15/2021, 15 de marsu ne’ebé mantein impozisaun serka sanitaria iha munisipiu Dili hahú iha loron 16 fulan marsu to’o loron 2 fulan abril.
Tuir rezolusaun ne'e mos hateten ema hotu tenki hakmatek iha fatin, laiha viajem husi Dili ba munisipiu seluk ou viajen husi munisipiu seluk mai Dili, exeptu iha autorizasaun husi SIJK.
Molok ne'e, Primeiru Ministru, Taur Matan Ruak fo autorizasaun exceptional ba SIJK atu fo lisensa ba ema ne'ebe hakarak ba munisipiu ou ba sira nia hela fatin. Maibe autorizasaun ne'e sai polemika ne'ebe kontrariu ho medidas serka sanitariu no konfinamentu obrigatoriu.
Tanba ne'e, sesta ohin, Xefe Governu bolu ekipa SIJK hodi deskuti regras seluk atu sumbete ba Konsellu Ministru.
Jornalista: Saturnina da Costa
Editor: Jose Sarito Amaral
