Ministru Administraun Estatál, Tomas do Rosario Cabral hateten, Primeiru Ministru deklara ona maibé MAE ho PCM sei aserta ida ne'e oinsá bele iha Komisaun ida atu bele haree bá prosesu kompetisaun ne'e.

"Ami sei deskute, Primeiru Ministru deklara tiha ona, Prezidensiá Konsellu Ministru ami sei aserta ida ne'e," dehan nia, iha Sentru KOnvensaun Dili (CCD) Kaikoli, horisehik.

Nia afirma, labele uza material mai husi li'ur maibé material lokál, labele uza gravador ka múzika ba dansa fali iha ne’ebá.

Entaun halo ida ne'e hodi kontribui ba iha buat tolu ne'e paz, damen no kontribui ba iha rai ne'e, tanba ne'e mak hein de'it diskute para iha komisaun ida atu haree.

Molok ne'e, Iha 01 Dezembru 2023 Primeiru-Ministru, Kay Rala Xanana Gusmão, husu ba juvendetu sira iha munisípiu hotu-hotu atu partisipa iha kompetisaun harii prezepiu natál ba dame husi festa selebrasaun loron Santo Natál 25 Dezembru no tinan foun 01 Janeiru 2024, ida ne'e atu hametin Juventude sira iha ambiente damen no paz.

Haktuir komunikadu, Xefe Governu informa, sei delega ekipa ida hala’o vizita ba munispiu no bairu idak-idak atu halo avaliasaun ba bairru ne’ebé juventude sira kreativu harii prezempiu  di’ak liu sei premiu hosi governu.

Deklarasaun ne'e PM Xanana hato'o, hafoin nia akompaña hamutuk ho ekipa Bombeirus no Eletrisidade Timor-Leste (EDTL) koa ai iha areadores Taibesi iha loron Sesta liu ba.

“Ha’u apela ba juventude iha Dili no munisipiu hotu- hotu iha kada suku imi hola parte ba  tuir kompetisaun harii prezepiu natál  hanesan uluk halo tiha ona. Ho ida ne’e sei fó premiu primeiru lugar, segundu lugar, terseiru lugar too kintu lugar ne’e ba prezepiu di’ak liu," dehan Komunikadu ne'ebé media Independente asesu husi Mídia gabimete PM, Segunda (03/12).

Haktuir komunikadu, PM dehan, maibé ho kondisaun, juventu iha suku laran tenki harii paz ho domin, labele tuku malu no estraga malu, tanba se prezepiu ida iha suku laran maka hetan primeiru lugar, maibé ema baku malu no tuku malu ne’e lamerese hetan.

PM Xanana husu atu juventude sira idak-idak hatudu sira nia kreatividade no dezeña prezepiu natál  labele uza materiál besi no tenki konstrui uma prezempiu ho materiál tradisional hanesan, ai, ka au, duut hali abut no pinta prezepiu natál no Menino Jesus bele uza kor oin-oin hodi hafurak uma prezepiu ho diak.

Governu sei koordena ho Komandu Jerál Polisia Nasionál Timor-Leste (PNTL) atu halo kontrolu ba kualker prezepiu natál ne’ebé harii besik estrada labele tuur no hemu tua iha laran.

Alende ida ne’e, governu la premite atu juventude sira kria konflitu durante selebrasaun loron santo natál no tinan foun. Tanba natál no tinan foun atu lori moris dame no kslok ba ema hotu.

Dadadau ne’e governu mós harii ona prezepiu iha Palasiu Governu no Palasiu Prezidensiál Prezidente Nicolau Lobato Dili, no jardin sira iha sidade Dili komesa monta ona  lampu oin-oin hodi hafurak ambiente natal no tinan foun.