Hafoin assina akordu, Diretór Jerál Administrasaun no Finansas MSSI, Rui Manuel Gago Exposto hatete, bazeia ba avaliasaun ba konkursu konstrusaun edifísiu foun Sentru Solidariedade Sosiál Munisípiu Likisa nian, kompaña Roman Junior mak sai vensedór.
"Ohin MSSI hala’o ona asina akordu hodi kompaña Roman Junior bele fasilita halo konstrusaun ba Edifísiu Sentru Solidariedade Sosiál Munisípiu Likisa," dehan komunikandu ne'ebé online INDEPENDENTE sita.
Diretór Jeral Administrasaun ne’e haktuir, durasaun ba konstrusaun edifisiu sentru Solidariedade Sosial ne’e fulan neen (6), hahú husi 01 Abríl 2023 to’o 30 Setembru 2023.
"Kona-ba rai la iha problema, tanba MSSI hetan ona atribuisaun husi Autoridade Munisípiu Likisa rasik," katak DJ.
Enkuantu, montante orsamentu ba konstrusaun refere mak, dolar amerikanu $312.994,10.
Entretantu, Diretór Kompaña Roman Junior, Unip, Lda, José Amaral rekomenda atu ekipa tékniku MSSI nian nafatin servisu hamutuk ho kompaña, nune’e sira bele hala’o servisu ho di’ak.
"Ami kompaña sei la husik ami nia responsabilidade ba konstrusaun edifísiu ne’e to’o remata tuir akordu ne’ebé ita assina ona," dehan Diretor kompaña.
