Nia dehan, tinan ida ne'e hanesan tinan politiku ne'ebé sei hala'o eleisaun parlamentar no eleisaun xefi suku nian, ne'ebé sei ezije PNTL nia nivel involvimentu aas no komprimisiu hodi mantein pás no eleisaun ida ne'ebé demokratiku.

Iha elisaun rua ne’ebe sei akontese iha tinan ida, PNTL sei mantein imparsialidade no independentemente durante iha tempu politika hodi hala'o servisu polisia nian ne'ebé profesionál no proporsionál hodi hametin demokrasia, sustenta ba dezenvolvimentu nasional no hametin prosperiedade.

Nia informa, PNTL nia asaun iha dezempeñamentu funsaun, tenke iha meus neutrál no imparsial hodi asegura partisipasaun sidadaun sira nian iha festa demokrasia ne'ebé sei hala'o ho livre, la hó interferensia no importante liu mak iha ambiente ida ne'ebé seguru.

“Ita hotu nia asaun iha dezempeñamentu funsaun, tenke iha meus neutrál no imparsial hodi asegura partisipasaun sidadaun sira nian iha festa demokrasia ne'ebé sei hala'o ho livre, lahó interferensia no importante liu maka iha ambiente ida ne'ebé seguru hanesan Komandante Jeral husu nafatin imi atu komporta didi'ak no aplika matenek,”dehan nia iha diskursu ofisial hafoin simu tomada de posse iha ambitu serimonia aniversariu PNTL nian ba dala-23, iha Kuartel EUP, Bairu Pite, Dili, segunda (27/03).

Nia afirma, instituisaun PNTL eziste ona durante tinan 23 hodi servi komunidade ho nasaun, tanba ne’e PNTL kontinua prátika disiplina diak, lealdade, hatudu respeita ba komunidade no povu sira, liu husi kontinuasaun dezenvolvimentu professional hodi kontinua dezenvolve atu sai forsa polisia ida ne'ebé modernu, hodi hetan respeitu husi komunidade, servidór, governu no parseiru sira, hatene katak agora daudaun Timor-Leste prepara atu sai membru permanente ASEAN.

Alende ne’e, nia dehan, PNTL la'ós atu asegura de'it nasaun nia dezenvolvimentu sustentavel liu husi mantein pás, seguransa no estabilidade iha teritóriu Timor-Leste nian, maibé bele mos fó nia kontribuisaun ba seguransa no atividade Polisiál nian hodi apoiu objetivu ASEAN nian no kontribui atu haforsa seguransa globál no rejionál nian.

Nia akresenta, krime transnasional sira hanesan droga, tráfiku umanu, Osan falsu, terrorista, atividade kontra bandu, peskas ilegais sei sai nafatin ameasa ba mundu inklui mós Timor-Leste. PNTL hanesan orgaun prinsipál ne'ebé sei ativu hola medidas hodi prevene, deteta, no kombate krime organizadu no transnasional.

“Ita mós sei dezenvolve ita-nia kapasidade hodi responde no investiga teknolojia kompleksu ne'ebé fó dalan ba krime inklui krime sira hanesan sibernetika. Ho nune'e, ita presiza apoiu no reforma lejizlasaun ne'ebé ha'u artikula ona iha ha'u-nia prioridade estratéjiku PNTL nian,” afirma nia.

Tanba ne’e, PNTL nia responde ba krime konvensional sira hanesan krime kontra umanidade no propriedade ne'ebé akontese iha komunidade nia leet tanba problema sosial no konflitu sira, sai nafatin propridade ba PNTL nia abordajen oriantadu polisiamentu komunitária nian.

Ho nune’e, PNTL servisu hamutuk ho parte interesada sira, komunidade no familia atu responde no rezolve konflitu sira no mós atu implementa estadu de direitu.

PNTL sei haka'as an atu minimiza estragu no dezorden iha Timor-laran tomak.

“Ita hatene atividade kontra bandu sira iha fronteira, ne'ebé sai mós oportunidade aproveitamentu ba krime organizadu sira,”dehan nia.

“Ba PNTL hotu, ha'u husu ita-boot sira hasa’e esforsu hodi asegura ita-nia fronteira rai maran no tasi atu kombate ameasa ne'ebé kontinua hamosu liu husi atividade ilegál sira, PNTL tenke prepara an ba situasaun saida de'it atu mosu, hodi asegura katak ita bele servisu hamutuk no parseria ho instituisaun sira relevante atu responde ho lais. Halakon ita-nia hahalok arrogansia hodi bele servisu hamutuk ho parte seluk atu servi ita-nia povu, servi ita-nia instituisaun PNTL, no nasaun Timor-Leste di'ak liu,” dehan nia.

Tanba ne’e PNTL sei servisu hamutuk Veteranu no veterana, Antigu Kombatentes, Juventude sira, responsavel Kaixa Komandu nian.

“Espesialmente imi hirak ne'ebé uluk orienta no organiza ami, povu Timor Leste tomak ho Postu no Kargu ne'ebé agora ami hetan ne hanesan responsabilidade ida atu servi rai ida ne diak liutan. Ami husu atu ita kontinua tulun malu no tulun PNTL no garante pás no estabilidade ba rai ida-ne'e,” hakotu nia.hodi servi ita-nia povu di'ak liután