Nia informa, tinan 23 insituisaun PNTL eziste hanesan ema ho idade ne’ebé adultu ona, ne'e nu'udar idade formativu ida ba PNTL, atu bele define nia karakteristika no hamriik firme iha komunidade Timor-Leste nia leet.
“Ami aprende husi ami-nia istória dezenvolvimentu no dezafiu sira iha pasadu ne'ebé apár ba ami-nia ajenda estratéjiku atu kontinua dezenvolve PNTL sai maturidade, durante ami nia mandatu tinan tolu nia laran, ami foti prioridade lima atu implementa,” dehan nia iha serimonia aniversariu PNTL nian ba dala-23 iha Kuartel UEP, Bairu Pite, segunda ne’e (27/03).
Komandante Jeral esplika, prioridade lima ne’ebé sei implementa mak hanesan, mellora jestaun instituisaun, haforsa lei no harmonizasaun lezislasaun, hametin kooperasaun instituisaun, mellora atendementu ba publiku no mós hametin paz no estabilidade seguransa interna.
“Ami hatene katak prioridade sira iha leten todan no presiza servisu maka’as, maibé ami fiar katak servisu iha ekipa ho parte hotu iha Governu, ho komunidade, sosiedade sivil no parseiru sira hotu, ita sei ultrapasa obstaklu sira ho diak no kontinua alkansa ami nia objetivu hodi mantein lei no ordem no proteze ba direitu no Liberdade iha ami nia nasaun furak ida ne’e,”tenik KomJer.
Entretantu, Vise Ministru Interior, Antonio Armindo, hatete, mudansa perfeitua no ohin sai tonka ba mudansa komando husi komadante PNTL sesante ba komadante PNTL foun.
Ho vizaun no misaun PNTL nia ne'ebé hanesan atu garante seguransa iha lei ho orden no estabilidade hodi asegura komprimisional lalaok politika nasional tuir ordem demokratiku hanesan estipula ona iha artigu 147 iha konstituisaun RDTL.
"Uluk nanain hato'o hau nia agradesimentu ba parte hotu ne'ebé ohin halibur ita iha ne'e atu sai sasin ba progresu, prosesu, mudansa no tonka estafeta komandu PNTL," dehan Vise MI.
Nia esplika, filosofia aparatur polisia iha mundu tomak mak fó garantia ba implementasaun lei no ordem, ne'ebé mak ho nia kondisaun sosial ida ne'ebé ideal refleta liu husi normas regulamentus no regras.
Nunue'e mos, Vise-Ministru Interior reprezentante Ministeriu interior kongratula no parabeniza ba Komadante Jeral PNTL, Komisariu Polisia Henrique da Costa no Segundu Komadante Jeral, Pedro Belo ne'ebé foin simu tomada de posse hodi kontinua lidera instituisaun PNTL ba periode hirak tuir mai.
