Nia dehan, governu planeadu atu sosa tán kilat-boot hodi distrubui bá kada membru FALINTIL Forsa Defeza Timor-Leste (F-FDTL), tanba durante ne’e, membru na’in-rua ka tolu kaer kilat troka malu de’it.

Tanba ne’e, planu akizisaun bá sosa tán kilat ne’e, hato’o husi Ministru Defeza (MD), Filomino da Paixão de Jesus, hafoin partisipa iha programa jornada planeamentu tinan 2024 ho tema “Hamutuk hadi’ak no hametin medidas prinsipais orsamentu jerál estadu 2024, hodi promove kresimentu inkluzivu no sustentável,” iha Ministériu Finansa, Ai-tarak Laran, Dili iha sesta foin lalais ne’e.

“Ita iha tinan ne’e, akizisaun kompletu bá Forsa Armadas, ema ida, kilat ida, tanba durante ne’e, ema ida, ema rua, ema tolu, uza torka malu kilat ida, agora lae,ita agora ho akizisaun tinan ne’e, ema ida, kilat ida. Ida-idak kaer nia kilat di’ak ka aat, ida-idak resposnábiliza,” Filomino, hafoin partisipa iha programa jornalda Planeamentu 2024 iha Ministeriu Finansas Ai-Tarak Laran Dili (24/03)

Tanba ne’e tuir planu, akizisaun bá kilat sira ne’e, sei hatama duni iha tinan ida ne’e, no sosa husi Estadus Unidus Amérika (EUA), tanba kualidade no orijinál liu hodi distribui bá membru F-FDTL sira.

“Akizisaun bá armas sira ne’e mai husi Amerika, ne’e original, sosa iha tinan ida ne’e, Lae  kuandu rua, tolu kaer kilat ida ne’e, ne’e ladiak, ne’e hanesan karreta ne’e, xofer tolu ne’e, ita haree problema, sempre ida sama embrajen oin seluk, sama rem oin seluk, ladun di’ak, tanba ne’e ita  sei sosa mós matralladóra, la’os la’o mesak de’it, Kilat ho matralladóras, ida ne’e mak buat di’ak ida ne’ebé mak ita halo,” hakotu nia.

Tuir nota imprensa ne’ebé Jornal INDEPENDENTE,asesu  antes ne’e, iha loron 03 Fevereiru 2023 iha aero portu Baucau, husi espesialista media Estadu Unidus Amerika (EUA),konaba apoiu finansiamentu, komandu Indo-Pasifiku hamutuk Millaun $ 1 bazeia ba pedidu husi Governu Timor-Leste atu sosa kilat ki’ik sira hodi hasa’e kapasidade Profisional F-FDTL nian.

“Ita nia kooperasaun seguransa iha tempu naruk sei ajuda Timor-Leste hametin ninia kapasidade atu monitoriza di'ak liután ninia territóriu, responde ba dezastre naturál sira, nune’e mos ita fahe vizaun komún ida ba rejiaun Indo-Pasifiku ne'ebé livre no nakloke iha ne'ebé governu sira bele halo sira-nia desizaun soberanu rasik no iha ne'ebé área kontrolu sira tenke governa tuir lei,” Dehan iha nota imprensa ne’ebé Jornal INDEPENDENTE Asesu iha espesialista media Estadu Unidus Amerika EUA, iha aero-portu Baucau fulan kotuk foi lalais ne’e.