Diretora Ezekutiva JSMP, Ana Paula Marçal hatete, durante halo observasaun iha Tribunál Distrital Dili, Suia, Baucau no Oekusse nota katak kazu violensia domestika ne’ebé relata ba iha Tribunál maioria vitima feto no labarik.
Nia afirma, husi monotorizasaun ne'e ami nafatin fó hanoin no rekomenda atu hadia prosesu Julgamentu no justisa di’ak ba povu sira.
"Ami nia observasaun iha Tribunál sira hare kazu violensia domestika numeru aas tebes, ne’e duni ami husu ba oarte hotu-hotu bele halo sosializasaun ba komunidade sira, atu nune'e vitima sira bele asesu justisa formal iha Tribunál sira," dehan Ana Paula Marcal iha Servisu fatin, foin lalais.
Nia hatutan, parte hotu presiza dezamina informasaun ba komunidade sira, nune’e vitima sira bele hakbesik an ba instituisaun ne'ebé fó asistensia legal ba sira, hanesan Polisia, Ministeriu Publiku no Tribunál.
"Iha buat balun ne'ebe sai preokupasaun mai ita hotu mak kazu violensia domestika maioria feto no labarik sira mak sai vitima, la'os mane mak sai vitima," nia preokupa.
Nia husu parte hotu liu-liu Ministeriu Justisa presiza dezamina informasaun ba vitima feto no labarik sira iha area rural, tanba dala barak informasaun sira to'o de’it iha Munisipiu, entaun komunidade la hatene lei kontra violensia domestika.
“Ida ne’e importante tebes, atu nune'e sira bele hetan asistensia legal hodi asesu ba justisa formal nian. Tanba, vitima barak mak la hatene kona ba lei kontra violensia demestika no lei seluk," tenik nia.
Enkuantu, kazu violensia domestika ne'ebé JSMP rejista iha Tribunál Distrital Baukau hamutuk 44, violensia bazeia ba jeneru 31, kazu ne’ebé involve menor 1 no abuzu sexual 2.
