Sekretáriu Jerál FRETILIN, Marí Alkatiri hatete, Partidu polítiku balun mai atu aproveita situasaun tomak ne'ebé povu tomak hakarak labele iha tán impase polítika.
“Entaun sira mai dehan vota ba ami-nia partidu, ami sei tau partidu boot rua ne'e atu hamutuk, lalika fiar, primeiru laiha partidu boot rua, iha partidu ida, Xanana, hakarak ka lakohi Xanana ne'e produtu FRETILIN nian, maibé la'o sala dalan tiha ona, ita labele iha konfuzaun ba ida ne'e, se la'e ita hanoin katak, vota ba Xanana ka vota ba FRETILIN hanesan de'it, la'e, la hanesan, FRETILIN uma-lisan, Xanana iha direitu atu fila mai uma-lisan ne'e, maibé enkuantu la fila, adversariu,” deklara Alkatiri iha ambitu konsolidasaun partidu FRETILIN, iha Aldeia São José, Suku Komoro, Postu Administrativu Dom Aleixo, Munisipiu Dili, Sabadu (25/03).
Tanba ne'e, eis Primeiru Ministru ne’e hatete, nia la mai atu halo konsolidasaun, maibé nia dehan tiha ona konsolidasaun ne'e, Vise sira, adjuntu sira, membru komisaun polítika Nasionál sira ho estrutura sub nasionais partidu mak halo.
“Ha'u mai atu hatete de'it katak estratéjia FRETILIN nian agora mak ida de'it, estratéjia mak ne'e, halo nusa mak ita bele luku nafatin ho povu, atu nani nafatin ho povu, atu loke dalan ba naroman,” Alkatiri deklara.
Labele Insulta Malu no Konta Istória
Iha fatin ketak, dosente Universidade Nasionál Timor Lorosa’e (UNTL), Alexandre Gentil de Corte-Real Araújo, husu ba Partidu Politiku sira atu labele insulta-malu no konta istoria iha tempu kampaña, tanba la eduka povu.
Alexandre la konkorda ho lider partidu politiku sira ne’ebé kontinua trata-malu no konta istoria durante tempu eleisaun.
“Ita ba kompaña ne’e atu fa’an ita-nia programa, la’os atu ba konta fali partidu seluk ka konta ema seluk, ida ne’e labele, tanba la edukativu, see mak manan iha eleisaun, demokrásia ne’e vale hotu,” dehan nia.
Tuir nia, atu evita ida ne’e, orgaun eleitorál sira tenke haree situasaun sira ne’e, atu partidu politiku sira iha kampaña labele provokativu, maibé edukativu.
“Ita tenke promote ba povu ‘imi nian ida ne’e mak importante, ami sei halo bainhira manan iha eleisaun. Aban-bainrua ami manan mak ami la halo, imi iha direitu atu protesta ami, agora imi hili, ami-nia programa sira ne’e di’ak ka la’e’, ida ne’e mak edukativu, la’os ba trata malu fali, tanba tempu Agora dezenvolvimentu mak importante, konta istoria no trata malu la’os tempu ona,” nia dehan.
Tuir nia, iha tempu rezistensia ema hotu-hotu luta no iha referendu laos ema ida rua de’it mak fó votus ba independensia.
“Ne’ebé para ona konta istoria sira ne’e, tanba ita konta bebeik mós ema lakohi rona, tanba manan ukun aan povu hotu-hotu nia kontribuisaun la’os ema ida ka rua, grupu ida ka rua, partidu ida ka rua de’it sei la manan,” katak nia.
Ba kampaña ba tinan ne’e, nia husu ba partidu politiku sira atu tenke prepara sira-nia programa hodi faan ba povu.
“Atu sensibiliza ema la’ós atu trata malu no konta istoria iha kampaña, ida ne’e mak ita sei eduka povu, agora povu haree, rona saida mak partidu sei halo bainhira manan eleisaun,” dehan nia.
