Tuir regras kada projetu bainhira orsamentu la to'o milaun $5 MOP bele halo ajudikasaun direita ba kompaña atu kaer projetu refere no la presiza tuir konkursu públiku ka la hetan vistu husi kámara das kontas husi Tribunál.
Tuir komunikadu imprensa ne’ebé Independente asesu, Ministru Obras Publiku, Samuel Marçal asina ona kontratu ho kompaña Montaña Di'ak hodi halo rehabilitasaun ba estrada husi Maubise ba Turiskai tanba kondisaun estrada grave tebes.
"Ohin ita mai asiste no kompaña prosesu asina kontratu ho empreza Montaña di'ak ba rehabilitasaun estrada Turiskaii liga ba postu Administrativu Maubise, ita boot sira hatene estrada ne'e kondisaun grave tebes,entaun liu husi selebrasaun kontratu ida ne'e bele fo esperansa ba povu turiskai katak governu la taka matan," haktuir husi komunikadu ne'ebe jornal INDEPENDENTE asesu iha (15/06).
Montante Orsamentu ba projetu rehabilitasaun estrada Turiskai hamutuk millaun $3.4, sei fo tempu ba kompaña atu mobiliza ekipamentu sira para atu hahú ona servisu no projetu ne’e tenke remata tuir tempu ne’ebé termina ona.
Nia husu ba komunidade sira atu kontribui no labele halo impedimentu ba empreza ne'ebé atu halo servisu ba projetu rehabilitasaun estrada.
Iha fatin hanesan, Vise Ministru Asuntu Parlamentar, Aderito Hugo da Costa hatete, estrada Maubise to'o Turiskai ne'e kondisaun grave desde tempu naruk ne'ebé iha mós estrada sira seluk husi Turiskai nian.
"Estrada husi Turiskai ne'e at desde uluk,laos turiskaii de'it maibé estrada sora seluk iha Munisipiu Manufahi mós,maibé governu hahú tau importansia hodi hadia estrada turiskai ba maubise"dehan nia.
Diretór Empreza Montaña Di'ak, Lay Fu Sen kompromete atu projetu estrada Turiskai ba Maubise sei halo ho kualidade di'ak bainhira implementa projetu sei halo tuir kontratu ne'ebé asina ona ho governu.
