Portavos José Belo hateten, relasiona ho atetudi kompañia estranjeiru ne’ebé abandona konstrusaun irrigasaun, komunidade ho natar na'in sira iha suku Betano hato’o petisaun ba ukun na'in sira atu kondena kompañia refere, tanba konstrusaun ne’e laiha kualidade ne’e duni halo mota bo’ot husi karau ulun sobu tia irigasaun refere, nune’e resulta natar barak mak abandona.

"Bazeia ba asuntu iha leten, ami povu ki’ik no natar-nain husi Betano, hakarak hato’o petisaun ba ukun na'in sira katak, ami la simu hahalok husi kompañia estranjeira ne'ebé halo natar na'in sira sai vitima durante tinan 10 resin ona," dehan José Belo ba Jornalista sira iha Bidau Toko Baru, (26/07).

Nia haktuir, nu’udar natar na’in sira kondena maka'as aktu kompañia ne’ebé laiha responsabilidade, tanba liu husi natar ida ne’e mak komunidade sira iha Betano hodi asegura sira nia moris  iha  tinan naruk nia laran, hahu kedas husi  avo sira nia tempu.

Husu ba  governu atu hola medidas hasoru ema sira ne’ebé uluk halo kontratu ho kompañia estranjeiru husi Philipina, tanba ita gasta orsamentu bo'ot ba projetu ne’e, maibé la fó benefisiu ba povu ki’ik no natar na’in sira.

"Ami ejize ba ukun na’in sira tenki obriga ema sira ne’ebé uluk kaer konstrusaun irigasaun iha mota bo'ot Karau -Ulun atu halo indeminizasaun, tanba husi ema sira ne'e nia hahalok, irigasaun refere mota sobu no natar barak mak abandona, ne’ebé rejulta natar na’in sira labele halo produsaun desde tinan 2019 to'o ohin loron," tenik nia.

Nia argumenta, bainhira ema sira ne’e halo indiminazasaun, komunidade hamutuk ho natar na’in sira sei lori sira ba justisa, nune’e sira bele responsabiliza aktu sira ne'e, tanba ema hotu - hotu hanesan iha lei nian oin nomos iha direitu no obrigasaun hanesan haktuir iha KRDTL art.16º, pontu 1 no estadu rasik mos hakruk ba Lei - Inan no Lei -oan, tuir KRDTL art. 2º, pontu 2.

Hafoin mota bo'ot Karau Ulun estraga tia irigasaun ne’e, kauze  natar ektares rihun 17 la utiliza ba atividade agrikola durante tinan sanulu resin oan.

Asunutu ne’e Prezidente Autoridade Munisipiu Manufahi, Luis Marçal da Costa Tavares hato'o ona ba publiku. Husu mós ba Parlamentu Nasional Komisaun D atu forma Komisaun Indenpendente ida hodi tun ba terenu no halo fiskalizasaun imediata ba irigasaun ne’ebe mota bo'ot Karau - Ulun sobu no povu ki'ik sira nian natar durante tinan 10 resin abandona hela.