Prezidente Komisaun F PN, Maria Barreto hateten, ko'alia kona-ba eletrisidade ne'ebé mate, maibé bazeia ba fiskalizasaun Komisaun F ba HNGV no mós ba orsamentu Jerál Estadu (OJE) kada tinan aloka ba HNGV, no mós ospitál referál sira.

“Iha HNGV ne'e iha generator ne'ebé preparadu iha ne’ebá, bain-hira EDTL ahi mate sira bele funsiona lalais generator ne'e,  tanba generator iha HNGV kompletu kedas ho orsamentu ne'ebé atu sosa gazolina kuandu ahi mate, no mós ho manutensaun ne'ebé ba HNGV buat hotu-hotu ita preparadu,” dehan nia, iha PN, horisehik.

Nia dehan, iha HNGV mak ahi mate sira la uza generator ida-ne'e mak ita presiza fo ketaun problema ne'e iha ne'ebé.

“Jeradór iha no mós orsamentu ba sosa gazolina no manutensaun, se orsamentu ne'e la uza problema ne’e iha ida ne'ebé! Tanba ida-ne'e sai preokupasaun ba ami,” nia hateten.

Ho nune’e, prezidente komisaun F ne’e husu ba Ministeriu Saude atu loke prosesu investigasaun ba problema ne’ebe mak akontese iha HNGV ne’ebe ahi mate lakan prejudika ba atendimentu pasiente sira.

“Pesoalmente ba ha'u núdar Prezidente Komisaun F, ha'u foti kestaun ne'e katak, buat ruma la'o laloos  iha   HNGV ne'ebá tanba ne'e husu ba Ministériu Saúde halo investigasaun, tanba-sá ahi mate la loke generator para bele atende lalais ba pasiente”. Nia hato’o.

Maria haktuir, tuir informasaun liu-husi media triste kuandu pasinte ne’ebé mate, tanba bainhira ahi mate nia labele hala’o kontinuasaun ba operasaun ruma afeita ba pasiente mate, ne'e tristeza boot ida ba ita-hotu.

Entretantu, ahi electrisidade mate lakan iha HNGV akontese iha loron Segunda 01 Abril 2024, nune'e afeita ba atendementu doutór sira nian ba pasiente sira.

Impaktu husi ahi eletrisidade mate iha HNGV maka loron tomak la halo operasaun (Sirurjia) ba moras balun tanba ahi la aguenta.

Pasiente balun ne'ebé komesa rekupera ona agora kondisaun grave fila fali tanba kauza husi ahi eletrisidade mate lakan no servisu nesesáriu balun labele la'o hodi atende pasiente sira.